Talisay PNP gimandoan nga tinud-on ang kampanya’s drugas

CEBU, Philippines - Ang kagamhanan sa dakbayan sa Talisay miawhag sa hepe sa kapolisan sa siyudad nga hingusgan ang kampanya batok sa ilegal nga drugas ug sugal ilabi na ang video karera.

Si Talisay City Administrator John Yre De los Reyes mibutyag nga ubay-ubay na nga report ang ilang nadawat kabahin sa giingong operasyon sa ilegal nga drugas ug video karera diha sa mga barangay sa siyudad.

Matud ni De los Reyes nga napaabot na nila ngadto kang Supt. Resty Santos ang maong report ug naglaum sila nga aksyonan dayon sa kapolisan ang maong problema.

Si De los Reyes nagkanayon nga misabot silang dili sayon nga tahas ang ilang gihangyo kang Santos apan nanghinaot silang hatagan kini og pagtagad.

Kahinumduman nga ang kapolisan sa Talisay gipaubos sa imbestigasyon tungod sa pasangil nga dunay polis sa siyudad nga drug protector apan gihimakak kini ni Santos.

Matud ni Santos nga hugot ang ilang kampaniya batok sa ilegal nga kalihukan ilabi na sa drugas.

Nunot niini si De los Reyes nagkanayon nga human sila masayod sa nahisgutang report ila dayong gipatawag si Santos ug gimanduan nga magpahigayon og imbestigasyon ngadto sa iyang mga sakop aron maklaro kun tinuod o dili ba ang maong pasangil.

Dugang ni De los Reyes nga sa labing dali nga panahon ang gihatag nilang higayon kang Santos nga makasumitir og resulta sa imbestigasyon. (Brenda D. Batuto/EIM)

Mga establisamento ipasusi kung giunsa paglabay ang mga hugaw

Giawhag ni 6th district Board Member Thadeo Ouano ang mga mayor sa kalungsoran sa pagsusi sa mga establisamento kun giunsa nila paglabay ang mga hinabwa nga mga hugaw gikan sa ilang mga pansayan.

Si Ouano nga maoy chairman sa committee on environment sa Hunta Probinsiyal miingon nga ang lokal nga kagamhanan maoy mohatag og business permit sa tukoron nga establisamento ug labing maayo nga malakip kini sa pagahimuon nga pagsuta sa kalimpiyo.

Si Ouano miingon nga ang Republic Act 7295 o Clean Water Act  dinhi sa nasud maoy gihatagan og dakung kaakohan ang mga lokal nga kagamhanan alang sa higpit niining pagpatuman.

Dugang pa niya nga gitumong kini aron dili mahugawan ang mga tinubdan sa tubig mainom sa publiko.

Si Ouano  miduso og resolusyon nga nag-awhag sa tanang mga mayor sa lalawigan sa Sugbo  pagmugna og “septage management program” nga gitumong alang sa tukma nga paghipos ug paglabay sa mga hugaw nga gisulod sa mga septic tank gikan sa kabalayan o nagkadaiyang establisamento sa lalawigan.

 Gipasabot ni Ouano nga dili lang kaakohan sa kagamhanan ang pagpreserbar sa kalimpiyo alang sa paghatag og kasiguroan sa panglawas sa katawhan kun dili lakip na usab niini ang publiko o mga pribado. (BANAT NEWS)