Poblete labing taas nga opisyal nga naigo sa revamp ni Rama

CEBU, Philippines - Pormal na nga gipahibalo ni Mayor Michael Rama ang mga department head sa Cebu City Hall nga naapektahan sa iyang paglahugay sa katungdanan sa iyang mga sinaligan.

Miiknat ang kilay bisan sa mga reporters nga nag-cover sa kagamhanan sa dakbayan sa Sugbo dihang gipahibalo ni Mayor Rama nga ang bag-o niya nga City Administrator karon mao na si Eugene Elizalde.

Si Elizalde maoy mohulip sa pwesto nga gihuptan ni City Administrator Jose Marie Poblete nga migunit sa mao nga katungdanan sukad kaniadtong 2010. Matud ni Rama nga si Poblete mao na usab ang molingkud isip acting city engineer hulip ni City Engineer Kenneth Carmelita Enriquez nga adto ibalhin isip hepe sa City Planning and Development Office.

Sayo pa niini, misibaw ang mga tabi-tabi nga si  kanhi  konsehal Jose Daluz III maoy itudlo ni Mayor Rama nga city administrator apan nakurat na lang ang publiko pagkasayod nga si Elizalde na maoy city administrator.

Wala makapasabot si Rama unsaon pagkuha og sweldo ni Poblete karon nga gidestino siya nga city engineer. Ang sweldo sa pagka city engineer adto gihapon mahipunta ni Engr. Enriquez kay permanent man siya nga city engineer base sa plantilla. Dunay bakante nga pwesto nga masudlan ni Poblete apan Engineer 3 nga gamay ra og sweldo. Si Poblete wala motubag dihang gikontak sa mga reporters aron kuhaan unta og pamahayag. Suod kaayo ni Mayor Rama si Eugene Elizalde mao nga wala na lang ‘sab matingala ang uban ngano nga mao kini ang gitudlo sa mayor nga magsilbi nga iyang city administrator. Ang mga department heads nga bag-o og katungdanan naglakip nila ni kanhi city veterinarian Alice Utlang isip hepe sa City Office for Substance Abuse Prevention; Fidel Magno, idestino sa Cebu City Jail aron moasikaso sa livelihood sa mga priso; Cathy Yso (Parian Drop-In Center); Arlene Rentuza (Internal Control Office); Maricon Encabo (Assistant City Planning Officer).

Atty. Mary Ann Suson (Assistant Personnel Chief; Atty Ferdinand Cañete (City Assessor) Dr. Daisy Villa (City Health); Dr. Stella Ygoña (CHAMP); kanhi City Assessor Eustaquio Cesa patabangon sa City Treasurer; Veronica Morelos (Assistant City Administrator); Atty. Leslie Ann Reyes ug Jojo Labella isip mga senior supervisors sa Public Information Office.

Si Vice Mayor Edgardo Labella mao na ang padumalahon ni Mayor Rama sa pagka chairman sa Police Coordinating and Advisory Council (PCAC). -/EIM (BANAT NEWS)