DSWD7 padayong misagop sa mga biktima sa Yolanda
CEBU, Philippines - Ang Department of Social Welfare and Development sa Central Visayas (DSWD-7) nagpadayon pa gihapon sa pag-atiman sa mga biktima sa miaging bagyong Yolanda gikan sa syudad sa Tacloban. Sumala pa ni Aileen Lariba, usa sa mga tigpamaba sa DSWD-7 nga ang mga personnel gikan sa ilang ahensya gipadala ngadto sa Mactan Air base aron makigkita niadtong mga tawo nga moabot dinhi sa Sugbo sakay sa C130.
Usa sa mga nasalbar sa DSWD mao ang biktima nga si Kevin Talbo, 24, nga taga San Jose, syudad sa Tacloban.
“Tiniis naming maglakad mula 10:00 ng gabi hanggang 3:30 ng umaga para makaabot sa airport at ang tatay ko, naka-wheelchair,†matud pa ni Kevin.
Adunay kapin sa 300 ka mga indibidwal ang nagkinahanglan og temporaryong kapuy-an ug nga naghulat nga moipon pagbalik sa ilang pamilya ug mga mahal sa kinabuhi kinsa gitabangan usab.
Si Pilar Ferreras, 84, usa sa mga nahiabot sa Sugbo sa miaging adlaw nagkanayon nga gisalbar siya sa iyang apo nga si David niadtong paghapak sa labing kusog nga hangin ug mga bawod sa dagat nga mugna sa storm surge sa bagyong Yolanda.
Miingon si Lariba nga sa pag-abot sa mga evacuees sa airport, ang DSWD personnel mi-interview kanila aron mahibaw-an ang ilang panginahanglan ug dayon mahatagan sila og pasiuna nga debriefing. Dugang pa ni Lariba nga adunay uban nga gihatagan og hot meals ug usab dapit nga mamahimo nilang katulgan lakip na ang paghatag og medikal nga hinabang alang sa mga edaran na nga samdan.
Samtang gimandoan usab ni DSWD Secretary Corazon Juliano Soliman ang mga DSWD Field Offices V, VII, X ug ang CARAGA sa paghatag og dugang relief operations sa Eastern Visayas.
Gibutyag ni Lariba nga kining maong mga opisinaha nag-repack na og mga relief items ug nga mipadala usab og mga personnel aron motabang sa pagpang-apod-apod niini ngadto sa mga biktima. (BANAT NEWS)
- Latest
