Ordinansa bahin sa pabuto gilig-on sa konseho sa Barili
CEBU, Philippines - Usa ka ordinansa ang giaprobahan sa konseho sa lungsod sa Barili nga mokontrolar sa paggamit sa rebentador o pabuto.
Kining maong ordinansa magdili sa pagpabrika , pamaligya, pag-apud-apod, paghupot sa mga pabuto ug uban pang matang sa susamang produkto nga may pulbora nga mosiga ug mobuto.
Si Konsehal Rene Alquizola, Chairman sa Komitiba sa Police, Public Order & Safety, mibutyag sa Banat News nga napasar ang maong ordinansa sa wala pa ang Pasko.
Matud ni Alquizola nga ang ilang tuyo mao nga ang mga negosyante niining firecracker magbaton usab og responsibilidad sa pagsiguro sa lawas ug kinabuhi sa katawhan nga mogamit sa ilang produkto.
Midugang si Alquizola nga sa maong ordinansa nahilakip usab ang pagtudlo og mga lugar nga angay pabuthan o kaha adto makapamaligya og pabuto.
Ang lugar sa lungsod nga ilang gitudlo nga maoy pabaligyaan sa maong mga produkto sa pabuto layo sa mga puluy-anan ug gidili usab ang pagpamaligya niini bisan asa.
Midugang si Alquizola nga ang lugar nga gitugot sa ordinansa nga mahimong “firecracker zone†mao ang tunga nga bahin sa public plaza, dapit sa simbahan nga duol ra usab sa kiosko.
Matud pa ni Alquizola nga didto sa maong dapit gitugot nga makapabuto og rebentador ang mga tawo nga walay modakop kanila.
Higpit nga gidili sa maong ordinansa ang pagpabuto og firecracker bisan asa ilabi na sa kadalanan tungod kay peligro kini sa lawas ug kinabuhi sa katawhan o kaha sa mga masunog nga kabtangan.
Usa usab sa katuyoan sa maong ordinansa mao ang pagpalurang sa climate change tungod kay ang pabuto maoy mohaling sa global warning.
Sa maong ordinansa, giawhag ang mga opisyal sa barangay sa pagpili ug pagtudlo sa ilang tagsa-tagsa ka firecracker zone sa ilang barangay.
Si Alquizola kinsa sa samang higayon chairman usab sa Committee on Public Affairs, Information, Communication ug Technology nagkanayon nga kining maong balaod ipatuman sa lungsod sa Barili hangtud sa hangtud. (BANAT NEWS)
- Latest