Malacañang milihok batok sa Mexican drug cartel

CEBU, Philippines - Giseguro sa Malacañang nga himuon ang tanang lakang sa gobyerno aron masumpo ang Mexican drug cartel nga giingong naglihok na karon sa  Pilipinas. Matud pa ni Kalihim Herminio “Sonny” Coloma, Jr. sa Presidential Communications Operations Office (PCOO) nga katungdanan sa mga alagad sa balaod nga dakpon ang bisan kinsang molapas sa balaod aron mapanalipdan ang katawhan.

“Siyempre po, pag-iibayuhin ang pagsisikap para masabat o mahuli ang mga lumalabag sa batas, pigilin ang kanilang krimen at pangalagaan ang kapakanan ng mga mamamayan,” matud pa ni Coloma. Gipasusi na sa Malacañang sa Bureau of Immigration (BI) ang record sa Interpol sa mga nalambigit sa Mexican drug cartel nga nia sa Pilipinas karon dala ang kinilo  nga shabu aron ibaligya.

Giingong gitugyan na usab sa BI ang pagsusi sa entry records sa mga miyembro sa Mexican Sinaloa drug syndicate.

Una niini, gibutyag  ni Philippine Drug Enforcement Agency (PDEA) Director General Arturo Cacdac, Jr., nga nakasulod na sa Pilipinas ang gikahadlokang Sinoloa drug syndicate sa Mexico.

Kini human sa ilang operasyon sa Batangas diin nasakmit nila ang 84 kilos nga methamphetamine hydrochloride o shabu nga nagkantidad og P420 milyones.  (/WC)(BANAT NEWS)