‘Suspek’ pagpatay sa polis nga napatay usab dili maldito

CEBU, Philippines - Gikatakdang modangop sa Commission on Human Rights ang banay sa lalaking gitumbok nga maoy mipusil patay kang PO1 Felicisimo Unabia tungod sa giingong dili makatarunganong gihimo sa mga polis sa maong suspek.

Ang iyaan sa suspetsadong mipusil patay kang PO1 Felicisimo Unabia mihimakak sa pasangil batok sa iyang pag-umangkon.

Sa report kagahapon sa Balitang Bisdak, si Era De Real, iyaan ni Jesser Gamboa, suspetsado sa pagpusil patay kang Unabia mihimakak sa pasangil nga ang iyang pag-umangkon usa ka gun for hire. Gihimakak usab ni De Real nga dunay kasong pagpatay ang iyang pag-umangkon apan napriso kini kaniadto tungod sa paghupot og armas  apan na-dismiss ang maong kaso.

Gawas niini gibutyag usab ni De Real nga napriso ang iyang pag-umangkon pila ka buwan tungod kay gipasanginlan og pagpatay apan  ang tagtungod sa biktima misulti nga walay labot sa hitabo si Gamboa nga maoy hinungdan sa pagka-dismiss sa kaso niini.

Matud usab ni De Real nga wala siya’y kalibutan kung miyembro ba og fraternity ang iyang pag-umangkon. Gihulagway ni De Real nga ang iyang pag-umangkon usa ka komediyante ug hingatawa ug dili kini  badlungon sukad sa pagkabata.

Gibutyag ni De Real nga niadtong buwan sa Septiyembre niining tuiga nakagawas gikan sa prisohan si Gamboa ug  nagtinarong na kini tungod sa iyang anak.

Matud sa iyaan kada adlaw si Gamboa adto ra sa ilang balay magbantay sa mga binuhing manok ug mouli lang kini ngadto sa barangay Awayan aron maligo ug mag-ilis.

Gikwestiyon ni De Real ang pasangil karon batok sa iyang pag-umangkon nga kung mao kini suspetsado sa pagpatay kang Unabia nganong wala kini ipatawag ngadto sa police station aron ipaubos sa imbestigasyon nga mao man gyud unta ang proseso.

Kahinumduman nga si Gamboa napatay atol sa gipahigayong operasyon sa kapolisan sa Provincial Intelligence Branch niadtong milabay’ng adlaw sa dakbayan sa Carcar.

Si De Real nagkanayon usab nga duna sila’y makuhang mga witness sa hitabo atol sa pagpusil sa iyang pag-umangkon, apan anha na sila mohikay sa ilang reklamo aron makab-ot ang hustisya ini og malubong na si Gamboa karong adlaw nga Domingo. (BANAT NEWS)