Coastal highway sa Mandaue padung sa Northern Cebu gitinguha ni Cortes

CEBU, Philippines - Gitinguha ni Mayor Jonas Cortes nga mahinayon ang proyekto nga kaugmaran sa coastal highway sa dakbayan sa Mandaue sanglit mao lamang kini ang bugtong paagi alang sa pagpaluag sa naghuot nga mga sakyanan nga motadlas sa ilang kadalanan.

Matud pa ni Cortes nga iyaha na kining gipresentar sa panagtigom nga gihimo sa Mega Cebu sanglit alang kaniya nagkinahanglan man kini og suporta sa uban nga mga opisyal sa kagamhanan.

Ang coastal highway project mao ang pagbutang og dalan nga manukad sa FF Cruz sa Reclamation Area nga mopidpid sa daplin sa kadagatan sa barangay Looc, barangay Opao, barangay Paknaan, barangay Labogon ug Jagobiao hangtod na ngadto sa kabarangayan sa Consolacion ug Liloan.

Si Cortes miingon nga kining maong proyekto maoy makahatag og kasulbaran sa panginahanglan sa katawhan nga pagpaluag sa kadalanan sa M.C. Briones ug dalan Ouano sa Mandaue City.

Dugang pa niya nga adunay mga sugyot alang sa pagpalapad sa maong mga dalan  apan alang kaniya lisod kini matuman sanglit daghang  establisamento nga maigo sa road widening.

Matud sa mayor nga ang Mandaue City nahimong sentro sa lugar nga dakbayan  nga ang tanan nga mopaingon sa dakbayan sa Sugbo o habagatang bahin sa lalawigan ug padung sa Lapulapu. (BANAT NEWS)