Pagdili sa mga fixers nakapaspas sa serbisyo sa Cebu City OBO
CEBU, Philippines - Giangkon sa kadagkuan sa Office of the Building Official (OBO) sa syudad sa Sugbo nga ang kamanduan ni Mayor Michael Mike Rama nga gukdon ang mga fixers usa sa nakatabang sa pagtaas sa koleksyon sa ilang buhatan.
Sumala pa ni Architect Florante Catalan, ang luyoluyong labaw sa OBO sa syudad sa Sugbo, nga nahimong mas sayon ang transaksyon sa OBO dihang wala nay mga fixers nga nakasulod sa ilang buhatan tungod sa gihingusgang adbokasya sa mayor. Kini ang hinungdan nga halos nidoble ang kita sa OBO niining tuiga itandi sa nakalabay nga tuig.
Base sa record sa OBO, si Catalan miingon nga nakakuha sila og P23.2 milyones nga kita gikan sa bulan sa Enero hangtud sa bulan sa Hulyo nga mas taas pa sa P13 milyones sa susamang bulan sa niaging tuig.
Iyang gipasabot nga sa P23.2 milyones nga kita sa OBO, P15.5 milyones ang gikan sa building permits, P3.8 milyones sa occupancy permits, P1.4 milyones sa mechanical permit, P1.7 milyones sa business inspection, P396,930 sa electrical permit ug P316,114 sa miscellaneous fee.
Ang OBO nakadawat og 486 ka aplikasyon para sa building permits ug 237 pa ang ilang naaprobahan, 394 ka occupancy permit ang ilang nadawat samtang 337 pa ang ilang natugotan.
Giaprobahan usab sa OBO ang 905 ka mga electrical permit application ug 536 ka electrical permit nga maoy dagkong tinubdan sa kinitaan sa OBO.
Gawas niini, gitumbok usab ni Catalan nga nakatabang sa pagsulbong sa ilang kita ang computerization program sa OBO tungod kay mahimo nang maka-inquire sa mga aplikasyon pinaagi lang sa text. (BANAT NEWS)
- Latest
