Bag-ong marine sanctuary di pakuhaa’g isda

CEBU, Philippines - Gidid-an  sa kagamhanan  sa dakbayan  sa Lapulapu  ang  mga  mananagat  sa  pagpangisda  sa bag-ong gisubhan nga ika-walong marine sanctuary sa dakbayan sa Lapulapu.

Ang Crimson Marine Sanctuary nga anaa sa Brgy. Mactan maoy ika-tulong dapit sa mainland Lapulapu nga gideklarar nga marine sanctuary.

 Ang  laing lima niini mao ang mga marine sanctuary sa isla sa Olango nga sakop sa dakbayan sa Lapulapu.

Atol sa pormal nga pagdeklarar sa Crimson Marine Sanctuary (CMS) sa milabay’ng adlaw, si Lapulapu City Mayor Paz Radaza subling mipadayag nga usa sa nakahatag og kinabuhi sa turismo sa dakbayan sa Lapulapu mao ang maanindot ug ikapasigarbong kinaiyahan sa kadagatan sa isla sa Mactan.

Ang CMS maoy usa sa mga dapit nga gihugpaan sa mga nindot nga sea corals ug nagkadaiyang klase sa isda ug nahimo kining itloganan sa mga isda.

Matud pa ni Mayor Radaza kinahanglan kining protektahan ug palamboon  ug dili pasipad-an.

Gumikan niini gidili na ang pagkuha og mga isda ug mga sea corals sa maong dapit aron dili maguba ang kinaiyahan ilawon sa dagat sa maong dapit.

Ang lokal nga kagamhanan adunay mga sinugo nga mag-monitor sa maong dapit aron sa pagsikop sa mga makalapas sa lagda niini ug dunay tukmang silot nga mahiaguman .

Ang duha ka sanctuary sa mainland Lapulapu mao ang Shangrilla's Marine Sanctuary, ug  Dakitdakit Marine Sanctuary sa Brgy. Maribago ug ang laing  lima sa Marine Santuary sa isla sa Olango mao ang Brgy. Talima, Brgy. Baring, Brgy. San Vicente, Brgy. Cauhagan ug Minantaw.

Ang  mga  mananagat higpit  nga  gidid-an  sa  pagpanguha  sa isda  ug  sea  corals  niining  mga dapita. (BANAT NEWS)