P4.3M pundo sa CCMC ipalit og tambal di ipagamit sa laing katuyoan

CEBU, Philippines - Dili mosugot ang Konseho sa Cebu City nga gamiton sa laing katuyoan ang wa nagamit nga kwarta nga nagkantidad og P4.3 milyones alang sa tambal sa Cebu City Medical Center kon CCMC nga planong ipalit na lang og medical, dental and laboratory supplies. Si Dr. Gloria Duterte ug OIC City Treasurer Diwa Cuevas giimbitahan sa konseho aron pag-esplikar kun asa gamiton ang P7.7 milyones nga natigom gawas sa P18 milyones nga pundo sa CCMC.

Ang siyudad maglain gyud og P18 milyones nga pundo kada kwarter sa supplemental budget niini alang sa janitorial services, pagkaon sa mga pasyente, tambal ug mga medical services.

Matud ni Konsehal Gerry Carillo, ang P4.3 milyones alang sa tambal alang lang gyud unta sa tambal gumikan kay dunay mga taho nga kuwang ang tambal sa CCMC.

Apan si Duterte miingon nga di angay nga mabalaka ang konseho gumikan kay daghan ang stocks nga tambal sa CCMC.

Lakip sa gihangyo ni Duterte nga ang sobra nga P2 milyones sa janitorial services gamiton pagpalit og office supplies; P130,000 usab nga pundong sobra sa pagkaon sa pasyente gamiton pagpalambo sa seguridad samtang ang kapin P2 milyones gamiton sa balayronon sa maintenance sa tambalanan. (BANAT NEWS)