Drayber sa habalhabal gipatay sa babaye ug lalaki

CEBU, Philippines - Patay nang napalgan ang usa ka habal habal drayber nga nagbuy-od daplin sa dalan distansya sa iyang motorsiklo nga gituohang gipatay didto sa barangay Saksak sa lungsod sa Pinamungahan niadtong niaging  kaadlawon.

Ang biktima mao si Roel Rosal Semblante, 41, nagpuyo sa Poblacion Occidental lungsod sa Consolacion.

Samtang ang suspek gihulagway lang nga usa ka lalaki ug babaye nga nagsakay usab og motorsiklo.

Matud ni PO1 Raymund Lleve sa Consolacion Police Station dihang nahinabi sa Banat News naghatud og pasahero sa maong lugar ang biktima ug wala na makabalik.

Dunay mga tawong nakakita sa patay’ng lawas niini nga nagbuy-od na sa dalan ug naglunang sa kaugalingong dugo. Sa pagsusi sa kapolisan duna kini mga samad pinusilan sa dughan ug tiyan ug dunay na-recover nga usa ka slug sa wala pa matino nga kalibre sa armas.

Nakita usab ang tsinelas sa biktima kinse metros gikan sa iyang motor, nagtuo ang kapolisan nga nakapadagan pa kini bisan napusilan na una pa natumba ug didto na kini gitiwasan hangtud namatay.

Gisusi pa karun sa kapulisan ang background sa biktima aron matumbok ang hinungdan sa krimen. (/EIM) (BANAT NEWS)