Manghod sa gipasanginlang notadong tulisan gipatay

CEBU, Philippines - Gidudahang naalaan ang 18-anyos nga batan-on nga manghod sa gipasanginlang notadong tulisan dihang kini gipusil ug namatay samtang nagduwa og billiards  sa Sitio Salvador sa barangay Tangke siyudad sa Talisay niadtong Domingo sa alas 11:25 sa gabii.

Ang biktima mao si Raymund Piloto, 18, nagpuyo sa maong lugar, padayon pa ang imbestigasyon sa kapolisan pagtumbok  kung si kinsa ang mga mamumuno tungod kay pulos tak-om ang mga molupyo sa lugar bisan ang uban kanila diha sa bilyaran.

Matud ni SPO2 Oliver Dacua sa Talisay City Police Station sa Banat News nga nagduwa ang biktima sa bilyaran dihang naabot ang usa ka lalaki nga milipot sa iyang luyo ug kalit nga mipusil sa luyong bahin sa ulo sa biktima.

Naigo sa luyong bahin sa ulo ang biktima ug natumba samtang yano ra kaayong mibiya palayo ang suspek kuyog ang iyang back up nga naglakaw.

Pag-abot sa mga mirespondeng mga polis gisuwayan unta nila pagdala ang biktima sa tambalanan apan gideklarar kini nga dead on arrival. Nakuha diha sa crime scene ang usa ka basiyo sa bala gikan sa usa ka calibre 45 nga pistola.

Nasuta sa gihimong imbestigasyon nga manghod ang biktima sa usa ka gipasanginlang notadong tulisan nga si Lantoy Piloto nga giingong maoy responsable sa mga pagpanulis sa barangay  San Roque ug Cansojong.

Nagtuo ang kapulisan nga naalaan ang biktima o ba kaha gipanimaslan kini sa nabiktima sa iyang igsoon.Padayon pa ang imbestigasyon sa kapulisan sa maong hitabo.  (BANAT NEWS)