Ilogay sa pwesto maoy gidudahang motibo sa pagpatay sa negosyante

CEBU, Philippines - Gituohang panag-ilog sa pwesto ang gitutukan sa imbestigasyon sa kapolisan nga maoy hinungdan sa pagpusil patay sa usa ka negosyante niadtong Biyernes sa kaadlawon diha sa sitio Kasagingan, barangay Lawaan III, dakbayan sa Talisay.

Si SPO1 Mikie Espina nga nahinabi sa Banat News mibutyag nga padayon ang ilang pagpahigayon og hot pursuit operation batok sa mga kriminal kinsa nailhan na sa kapolisan.

Si Espina nagkanayon nga sa wala pa mahitabo ang pagpamusil, ang magtiayon dunay nakalalis nga kauban usab nilang mga vendor diha sa Tabunok niadtong milabay’ng Huwebes sa gabii.

Si Espina midugang nga ang pamilya sa biktima naninda diha og mga sapatos, RTW ug mga kitchen ware sa Tabunok sukad pa niadtong tuig 1978.

Dihang gisirad-an ang merkado sa Tabunok nabalhin kini og paninda apan dihang ang bag-ong administrasyon mitugot sa mga vendor nga pabalikon og paninda sa Tabunok maong mibalik usab sila sa Tabunok apan gikabangi nila ang laing mga vendors nga ilang ka kompetensiya tungod sa pwesto.

Matud ni Espina duna nay ideya ang mga imbestigador si kinsa ang mga mamumuno ug ilaha na kini karong gipangita, apan ang usa gidudahang usa ka gun for hire. (BANAT NEWS)