Hapon nga nangilad sa ilang gobiyerno arestado dinhi sa Sugbu
CEBU, Philippines - Usa ka Japanese national kinsa giingong wanted sa ilang nasud sa Japan ang gisikop kagahapon sa hapon sa mga sakop sa Bureau of Immigration and Deportation (BID) diha sa barangay Casili, lungsod sa Consolacion.
Sa report sa Balitang Bisdak kagahapon, ang suspetsado nailhan nga si Oyama Takahiro, 32-anyos, kinsa temporaryong nagpuyo diha sa lugar lumad nga taga Fukuoka, Japan.
Giingong napulo na ka tuig nga sulod gawas nganhi sa nasud si Takahiro ug gikwestiyon ang iyang pagsulod nganhi sa nasud tungod kay giingong wanted kini ngadto sa Japan sa kasong fraud.
Base usab sa report nga gikanselar na ang passport ni Takahiro ug ang embahada sa Japan nakig-coordinate na kini sa BID.
Kagahapon sa alas 8:00 sa gabii si Takahero gikatakdang ipadala ngadto sa kaulohan aron ngadto himuon ang dugang pang imbestigasyon.
Sa laing report sa TV Patrol Central Visayas giingong mi-claim si Takahiro sa hinabang pinansyal nga miabot og binilyon ka Japanese Yen didto sa ilang nasud nga gipanghatag sa mga nabiktima sa tsunami. (Brenda D. Batuto/EIM) (BANAT NEWS)
- Latest
