Babaye wa lugosa, apan gidunggab 27 ka higayon

CEBU, Philippines - Walay nahitabong pagpanglugos sa babayeng gitusak og dunggab sa iyang giingong hinigugma niadtong Miyerkules sa buntag diha sa sitio Viewhills barangay Quiot dakbayan sa sa Sugbo.

Nasayran hinuon nga 27 ka samad dinunggaban ang naangkon sa biktima nga maoy nakaingon sa iyang kamatayon.

Ang medico legal sa kapolisan Dr. Nestor Satur mipadayag dihang nahinabi sa Banat News wala malugos ang biktimang si Jeysila Muñoz, 25, kinsa gipatay sa nangangkong iyang uyab nga si Benedicto Longrino,45. Dako ang pagduda ni Satur nga padung pa unta nga pahimuslan ang biktima apan wala kini madayon tungod kay midagan ug nangayo og tabang ang biktima sa iyang mga boardmates.

Dugang pa ni Satur nga  hilabihan ka fatal ang mga samad dinunggaban tungod kay hasta ang kasingkasing naigo ug milapos sa iyang baga ang mga samad.

“Pag-swabbing namo, uga ra man kaayo, padung pa siguro to siya i-rape kay naa pa man ang iyang panty. Pero ang iyang mga stab wounds ako’y gingilngigan kay brutal kaayo. Mura man og nayawaan ang nagdunggab niya,” matud pa ni Satur.

Kahinumduman nga niadtong Miyerkules sa kaadlawon nahitabo ang pagpanunggab human ang suspek nangangkong nagselos kini tungod kay adunay duha ka lalaki ug usa ka babayeng nanuyop uban sa biktima sa kwarto niini.

Gawas usab niini, giingong wala usab makauyon ang suspetsado sa gikatahong pagbalibad sa biktima nga makighilawas kaniya.

Human sa maong insidente ang suspetsado misibat apan nasikop gihapon kini sa kapolisan didto sa dakbayan sa Toledo samtang kini nagpaabot og masakyan padung sa San Carlos City.

Ang suspetsado wala mihimakak sa maong pasangil ug mitug-an nga nakasuyop siya sa wala pa mahitabo ang insidente.

Ang biktima giingong dugay nang buwag sa iyang bana diin aduna silay duha ka anak nga nagpangidarun og 8-anyos ug 4-anyos. (Lesley Caminade-Vestil/EIM) (BANAT NEWS)