Buhatan sa Talisay City Administrator gihimulbolan sa gamit gidonar sa TCSC

CEBU, Philippines - Mga butang nga gikan sa buhatan sa Talisay City administrator ug gidonar ngadto sa Talisay City State College ang ipauli sa bag-ong administrasyon sa siyudad.

Ang bag-ong city administrator sa Talisay nga si John Rey delos Reyes nahingangha dihang ang iyang naabtan sa iyang pagpuli diha sa buhatan mao ang mga mono bloc na lang nga lingkuranan, gubaon nga computer ug telepono ug karaang kabinet ug bugtong ang iyang office table mao ray dili gubaon. Matud ni delos Reyes nga sa maong sitwasyon wala dayon sila makasugod sa ilang transaksiyon tungod kay wala silay magamit nga computer.

Nasuta nga ang ubang gamit sa buhatan sa city admin gidonar kini ni kanhi Mayor Socrates Fernandez ngadto sa TCSC kansang acting president karon mao ang kanhi city administrator nga si Richel Bacaltos.

Si Fernandez milagda sa maong deed of donation niadtong Hunyo 26, 2013 upat ka adlaw una pa moasumir sa posisyon ang bag-ong administrasyon.

Si Atty. Alfredo Sipalay ang bag-ong city legal officer nga nahinabi sa  mga tigbalita kagahapon nagkanayon nga ipauli nila ang maong mga gamit ngadto sa buhatan sa city administrator.

Matud ni Sipalay nga ang maong mga butang gipanag-iya sa siyudad ug si Fernandez lakip si Bacaltos pwedeng mapasakaan og kasong kalapasang anti-graft and corrupt practices act.

Gipasabot ni Sipalay nga ang mga butang pwede lang kining madonar kung dunay pagtugot o giaprobahan sa konseho sa siyudad o sa Commission on Audit (COA).

Si Fernandez sa iyang bahin, nagkanayon nga gisuspenso pa ang maong deed of donation ug kompletohon lang una ang mga kinahanglanon nga dokumento.

Samtang si Bacaltos nagkanayon nga kung buot kining kuhaon sa bag-ong administrasyon karon andam usab niya kining ihatag og balik. (BANAT NEWS)