Listahan sa mga lungsod nga init kaayo ang politika nadugangan

CEBU, Philippines - Nadugangan ang listahan sa mga lugar nga gipaubos sa Election Watch List Areas kini atol sa ilang gihimong panagtagbo sa kadagkuan sa Commission on Election ug Armed Forces of the Philippines kagahapon. Ang nadugang sa EWAs mao ang lungsod sa Compostela ug Pinamungahan tungod sa kainit sa panagribal sa politika sa mga kandidato niini.

Ang hepe sa kapolisan sa lalawigan sa Sugbo Sr. Supt. Patrocinio Comendador, mibutyag nga base sa ilang election security plan, adunay upat na ka lugar nga ilang gibutang sa ‘high risk’  nga mao ang dakbayan sa Bogo, Danao, lungsod sa Tuburan ug Dumanjug. Samtang ang mga lugar nga nahimutang sa ‘medium’ mao kining mga lugar sa Daanbantayan, Medellin, San Remigio, Tabogon, Tabuelan, Consolacion, San Fernando, Barili, Ronda, Ginatilan, Sogod, Compostela ug Pinamungahan.

Matud ni Comendador nga ang pag-classify nila sa mga lugar gibase kini sa kainiton sa panagribal sa mga kandidatong nanagan ug ang mga election related violence sa mga nangaging piniliay.

Ang security plan sa kapolisan naglakip sa hingusgang police visibility, transport security, polling place security, pro-action, concern teams, canvassing security, ug reserbang mga personnel.

Gipahibalo usab  ni  Comelec 7 regional director Temie Lambino nga andam na sila sa umaabot nga piniliay.

Iyang gidasig ang AFP ug ang PNP nga bantayan ang mga lugar nga init ang panagbangi sa mga politiko. (BANAT NEWS)