Renewal sa mga kontrata sa mga consultant sa City hall aprobado na

CEBU, Philippines - Giaprobahan sa konseho sa dakbayan sa Sugbo ang pag-renew sa kontrata sa 45 ka consultants sa dakbayan, 23 niini consultant ni Mayor Michael Rama ug ang 22 sa bise mayor ug sa mga konsehal.

Apan matud pa nga nabentahaan si Mayor Rama tungod kay duha sa iyang mga consultants nga sila si Atty. Jade Ponce ug Ester Cubero wala iapil sa lista tungod kay adunay mga konsehal nga wala makagusto kanila.

Mitumaw ang tabitabi sa City Hall nga gikauyonan sa mga opisyal sa “executive” ug “legislative” departments nga si Ponce ug Cubero dili iapil sa mga consultants sa mayor, basta sila si Guillermo “Dodong” Casinillo ug Felix Jose “Joeling” Lazarte dili usab iapil sa consultants sa City Council.

Wala hinoon gikonpirmar sa mayor nga aduna siya’y kasabotan uban sa City Council kabahin sa maong isyu kay matud pa niya ang paghikay sa mga consultants iya kining gisalig kang Konsehal Jose Daluz III nga iyang alalay sa konseho. Si Daluz wala motunga sa sesyon sa konseho kagahapon.

Si Mayor Rama wala kaayo mohatag og komentaryo dihang gikuhaan og pamahayag sa maong isyu. Matud ni Rama nga makigsulti usa siya kang Daluz ug sa iyang mga abogado. Ang mga suod sa mayor mitug-an sa mga reporters nga si Ponce wala magustohi sa mga konsehal kay mao kini ang miawhag ni Rama nga dili pabayran ang mga Rallos sa yuta niini sa Barangay Sambag II nga pabayran na unta sa mga konsehal.

Si Cubero usab gikataho nga gikasumpaki ni Vice Mayor Joy Augustus Young dihang didto pa kini nag-opisina sa Vice Mayor’s Office kaniadto.

Sila si Lazarte ug Casinillo wala usab magustohi sa mga opisyal sa legislative department nga mahimong consultants sa konseho kay gitan-aw nila kini nga nalambigit sa kampanya pabor sa BOPK. (BANAT NEWS)