Carlo Dugaduga gireklamo ngadto sa Ombudsman

CEBU, Philippines - Gipasakaan og reklamo sa Ombudsman Visayas ang ang tigpamaba ni Mayor Michael Rama ug information officer sa kagamhanan sa siyudad sa Sugbo nga si  Florito Carlo Dugaduga sa usa ka magbubuhis nga taga Butuan City.

Sa anonymous complaint nga giduso sa buhatan sa Ombudsman Visayas niadtong Biyernes sa hapon mireklamo sa pagsilbing information officer ni Dugaduga dinhi sa dakbayan sa Sugbo.

Matud pa sa maong reklamante nagsilbi usab nga official barker kon komentarista ni Butuan City Mayor Ferdinand Amante ang kandidato sa Liberal Party kon LP sa maong siyudad

Base sa giduso nga reklamo,  si Dugaduga nagdawatan og kinatibuk-ang suholan sa kontrata nga nagkantidad og P1.2milyones ug gani sagad makit-an si Dugaduga sa mga pulongpulong sa barangay ni Amante ilabi na panahon sa adlaw’ng Sabado ug Domingo.

Gawas niini, nagdumala usab si Dugaduga og blocktime program sa mayor sa usa ka sibyaanan sa Butuan City matag alas 5:30 hangtud alas 6:00 sa buntag sugod niadtong petsa 13 sa niaging bulan sa Enero gikan sa adlaw’ng Lunes hangtud Sabado ug alas 7:30 am hangtud alas 9:30 sa buntag ug nagpaila pa kining “organic member” sa radyo.

Tungod niini giawhag ang Ombudsman pag-imbestigar ni Dugaduga tungod sa kalapasan sa lagda sa balaod nga nagdili sa mga opisyal sa gobiyerno pag-apil apil sa kalihukan ug pag-promote sa kandidatura sa mga politiko.

Gipanawagan niini ang pagpahamtang og preventive suspension batok ni Dugaduga aron dili maka-impluwensiya sa imbestigasyon sa maong reklamo. Si Dugaduga sa iyang bahin,  nitataw dihang nahinabi sa Banat News nga ang maong reklamo batok niya usa lang kini ka paagi aron sa pagpakauwaw sa iyang pagkatawo isip opisyal sa gobiyerno.

Giangkon ni Dugaduga ang iyang pagtabang ni Mayor Amante dili tungod sa ilang pagkasuod nga higala kun dili tungod sa paningkamot niini nga makab-ot ang tarung nga panggobyerno aron mahunong ug walay mahitabong pagpangayo og kickback gikan sa mga negosyante.

Laing katarungan ni Dugaduga sa pagsuporta sa kandidatura ni Mayor Amante mao ang kampanya niini pagpanalipod batok sa kinaiyahan sama sa pagpanakop sa mga ipalusot nga kahoy sa maong siyudad ug rehabilitasyon sa kinaiyahan pinaagi sa pagpananom og mga kahoy.

Matud ni Dugaduga wala siyay nakitang probisyon sa balaod nga nagdili paglaban sa usa ka tawo nga nagtinguha alang sa tarung ug tul-id nga pangagamhanan. (BANAT NEWS)