Pasangil nga ginerbyos si Gwen gipanghimakak

CEBU, Philippines - Kusganong gipanghimakak sa buhatan ni suspendidong gobernador  Gwendolyn  Garcia  nga  may  nervous breakdown  na  ang  gobernador   agi  og  epekto sa iyang  kaguol human  siya  suspendiha  sa Malacañang  sa miaging  Disyembre 2012.

Matud pa ni   manlalaban  Christina Garcia Frasco nga walay sakit ang iyang inahan sukwahi sa mikatap nga mga huhungihong karon  nga  nagdaot  sa dungog  sa iyang  inahan. Gani  gitataw   ni Frasco nga himsog ug lagsik kaayo ang iyang inahan ug nagpabiling lig-on ug  way  kukahadlok  nga  moharong  sa iyang  mga  kaatbang  sa politika.

 Iyang gitataw nga ang iyang inahan mikaon pa gani og lechon nga gihatag sa iyang mga supporter kinsa   padayon nga nidagsa sa buhatan sa gobernador. Nagtuo si Atty. Frasco nga lain na usab kining pagdaut sa iyang inahan gikan  sa mga  kaatbang  sa politika  niini.

Apan  bisan  pa  niini  matud  pa  ni Frasco  nga  ang  iyang  inahan  dili  moundang  sa pagkuwestiyon  niining  suspension  order  nga  gipakanaog  sa  buhatan  ni  Presidente  Benigno Aquino  gumikan    alang  kanilang  mga abogado  sa kampo sa iyang  gisuspensong  inahan  usa ka  illegal  nga  lakang.

Matud  pa  ni Frasco  nga  sa oral  argument  ugmang  adlawa  ilang  iampo  nga  moluwat  na ang  court  of appeals sa temporary  restraining  order alang  sa paglibkas  sa  pagkasuspenso  sa  gobernador.

Kun mahitabo  kini  matud  pa  ni  Frasco  magpista  sa kalipay  ang tanang  mga  suporter  sa iyang  inahan  uban  sa kasigurohan  sa ilang  kadaogan  sa umaabot  nga election  sa Mayo  niining tuiga. Ang suspendidong  gobernador  maoy  kandidato  sa pagka-kongresista  sa ikatulong  distrito  sa lalawigan  sa  Sugbo  ubos sa  One  Cebu  Party. (BANAT NEWS)