Public school teachers sa siyudad sa Sugbo may tagP10 mil bonus karong Pasko
CEBU, Philippines - Makadawat og sayong pinaskuhan ang mga public school teacher sa siyudad sa Sugbo dihang gisibya ni Cebu City Mayor Michael Rama nga ang siyudad ubos sa school board mang-apud-apod og tag P10,000 cash ngadto sa kapin sa 5,000 nga magtutudlo sa siyudad.
Si Rama mihimo sa among announcement sa miaging gabii atol sa Teachers’ Day Celebration didto sa Plaza Independencia. Apan wala pa ibutyag kung kanus-a kini sugdan sa pagpanghatag ni DSWS head Esther Concha.
Giawhag ni Rama atol sa maong kasaulogan ang mga magtutudlo nga ipadayon ang paghulma sa kabataan aron mamahimo silang leaders puhon sa nasud.
“Tabangi ang mga bata kay sila ang kaugmaon sa atong nasud. Tagai og panahon nga tudloan sila kay pinangga sila sa Ginoo ug puhon mamahimo ni silang umaabot nga mga leaders sa atong nasud,” matud pa ni Rama. Si Department of Education (DepEd) Cebu City Superintendent Dr. Rheamar Angtud malipayon sa increase kay makapalipay gyud kini sa mga magtutudlo ug makatabang pud ni sa ilang mga pinansiyal nga panginahanglan.
Matud ni Angtud nga sa mga milabay’ng tuig, tag P5,000 ra ang bonus sa mga magtutudlo.
Ang Teachers’ Day dinhi sa siyudad gi-schedule unta sa Nobiyembre 30, apan gisibog tungod sa National Thanksgiving Mass ni San Pedro Calungsod.
“The teachers are heroes, especially those who stayed in the country and are just satisfied with the lesser pay that they will get compared to what they can earn by teaching outside the country,” matud ni UNA Deputy Secretary ug senatorial candidate Nancy Binay isip representante sa amahang si Bise Presidente Jejomar Binay nga maoy guest speaker. (Marigold P. Lebumfacil/EIM) (BANAT NEWS)
- Latest
