Inside job gisusi sa pagkawat sa mga antigong espada

CEBU, Philippines - Miapil na sa imbestigasyon ang kagamhanan sa siyudad sa Sugbo kabahin sa nahitabong pagpangawat sa mga antigong espada ug bayoneta sulod sa Fort San Pedro Museum ning dakbayan.

Gibutyag kagahapon sa chief of staff ni Mayor Michael Rama nga si Philip Zafra nga gawas sa kapolisan motabang na usab ang City Hall sa paghimo og imbestigasyon kalabot sa nawalang mga karaang espada.

Ang Civil Security Unit sa City Hall mohimo og linaing imbestigasyon ilabi na karon nga usa sa gitan-aw nga anggulo mao nga inside job ang pagpangawat.

“Makonsensya unta ang nagkuha ato. Angayan unta nila huna-hunaon nga naa tu’y historical value”, sumala pa ni Zafra.

Una na nga gipadayag sa bag-ong nagdumala sa Fort San Pedro nga si Erwin dela Cerna nga nagkinahanglan na gyud og CCTV (Closed Circuit Television) camera ang maong museum aron malikayan ang pagpangawat.

Matud pa ni dela Cerna nga ni-request na sila og CCTV camera kaniadto apan wa kini aprobahi sa konseho busa iyahang panghinaut nga maaprobahan na unta kini sa sunod nila nga request.

Ang maong mga espada giingong gigamit kaniadto sa mga “ Katipunero” ug giingong gipahimutang kini sa Rizal Memorial Museum diha sa Osmeña Boulevard apan gibalhin kini sa Fort San Pedro human gipaubos sa renobasyon ang unang gibutangan nini.

Ang Fort San Pedro adunay unom ka mga gwardya sulod sa 24-oras apan gibahin sila katulo sa matag adlaw nga nagpasabot duha ra ka gwardiya matag walo ka oras ang magbantay.

Dako kaayo og bili ang nahisgutang mga espada gumikan kay mao kini ang gigamit sa mga Filipino nga nakigbatok sa mga Kastila aron makalingkawas sa mga kamot sa mga Espanyol.

Ang Theft and Robbery Section sa Cebu City Police Office nanguha na og latent prints sa mga empleyado sa maong museum. Nasuta usab nga dili sirad-an ang bildo nga kaha nga gibutangan sa maong mga espada. (BANAT NEWS)