Presiding officer gihulagway ni Gwen nga na-amnesia

CEBU, Philippines - Gihulagway ni Governor Gwendolyn  Garcia nga  na-amnesia ang presiding officer sa provincial board kay nakalimot na kini  sa mga programa  sa iyang  buhatan.

Matud  pa  ni Garcia  nga  nahibulong nganong  nakalimot  na ang  maong presiding officer  nga  wa  niya hinganli,  nga  siya  man  untay action officer  sa  Kapitolyo  apan  wala naman  makahinumdom  sa mga programa  sa gobernador.

"May I remind her that she was always, more open than not, the action officer of this program. If suddenly she cannot understand now, wow what do we call this, amnesia?, " miingon  ang gobernador .

Nagkanayon  siya nga  ang  dili angay  makalimtan  sa   maong  opisyal   ang  mga programa  sa gobernador  sama sa Suroy-suroy Sugbo ug Egwen ug uban  pa  nga  gipasigarbo  kaayo  karon  sa  mga   sakop sa hunta probinsiyal.

Gumikan  niini nakahukom si  Garcia  nga iya  na  nga  tugotan  ang  mga  department head   sa Kapitolyo nga makatambong sa caucus  sa mga sakop sa hunta probinsiyal.

Kini aron makatarong og pangutana ang presiding officer ug ang mga sakop sa hunta probinsiyal kanila ug  sa samang  higayon  matubag  nila  ang  giingong  makalibog  nga  programa  sa gobernador.

Gusto  sa gobernador nga ma-rekord  og  maayo  ang  mga  butang  tukion sa caucus  sa mga provincial board member nga tambongan sa mga department head sama sa ipahigayon nga congressional investigation aron matarong og sabot sa sakop sa hunta probinsiyal ang gikinahanglan nga mga programa sa lalawigan sa Sugbo. (BANAT NEWS)