Hapon nalumos gyud-Medico Legal

CEBU, Philippines - Nalumos gyud ang 39-anyos nga turistang Hapon nga nalumos sa Pandanon Island nga sakop na sa lungsod sa Getape, Bohol apan sa kapolisan sa dakbayan sa Lapulapu na-report ang aksidente.

Samtang wala na ipaawtopsiya sa mga kabanay ang patay’ng lawas sa tiguwang babayeng Koreana nga nalumos usab gihapon sa usa ka dive spot sa barangay Talima sa isla sa Olango sa siyudad sa Lapulapu. Sila si Hyo Kim Ahn, 63, taga South Korea ug Hapon nga si Kenji Inamasu, taga Fukouka, Japan nalumos niadtong Sabado sa hapon samtang nag-snokeling sa Olango ug sa Pandanon islands.

Si Dr. Nestor Satur ang pangulong medico legal officer sa PNP Crime Laboratory -7 nga maoy mi-awtopsiya kang Inamasu mitug-an sa Banat News nga napuno gyud og tubig ang baga sa Hapon nga nakaingon sa kamatayon niini.

Si Inamasu sumala pa sa imbestigador sa Homicide Section nga si PO2 Winston Ybañez sa unang pakighinabi napalgan sa mga kauban nga nakulob nga naglutaw sa dagat, patay na kini pag-abot sa tambalanan.

Matud pa ni Ybañez ang kauban ni Inamasu mibutyag nga duna nay gihambing balatian si Inamasu, samtang si Satur sa pag-autopsy sa lawas sa maong langyaw miingon nga duna gyud siya’y nakit-ang kakulian sa baga niini sama sa hubak.

Samtang ang mga kabanay ni Ahn matud pang Satur wala na mopaawtopsiya niini sanglit nadawat na nilang aksidente ang nahitabo ug duna gyuy balatian ang maong namatay nilang kabanay.

Sumala pang Satur nga gipa-cremate na ang patay’ng lawas niini kagahapon diha sa Rolling Hills aron dad-on balik sa South Korea aron didto kini ipahiluna.

Si Sr.Insp. Zenaido Pastorfide Jr. sa pakighinabi sa Banat News nagkanayon nga ilang gipaabot ang autopsy report aron tinuod kung mga indikasyong may foul play sa kamatayon sa duha aron makahimo sila og imbestigasyong kriminal.

Matud pang Pastorfide ang mga kabanay sa mga namatay kung sa ilang paminaw kinahanglang may manubag sa aksidente matud pa niya mahimong moduol og abogado aron makapasaka og kasong sibil batok sa boat operators o si bisan kinsang may kalambigitan sa pagsuroysuroy sa mga namatay. (BANAT NEWS)