Pag-Estrikto sa MVIC daghang hagbong
CEBU, Philippines - Daghang public utility vehicles sama sa passenger jeepneys (PUJ), mga bus ug taxi nga dili na makadagan sa pagpamasahero kun estriktohon na pag-ayo ang pag-inspection sa mga sakyanan diha sa LTO-Motor Vehicle Inspection Center.
Si LTO Assistant Regional Director Arnel Tancinco gihatagan og dugang tahas ni LTO Regional Director Raul Aguilos nga maoy modumala sa MVIC diha sa Mandaue City human mabantaying dunay binuang sa maong opisina kaniadto.
Bisan ang mga road law enforcers sa LTO nakabantay nga dunay mga sakyanan kansang mga drayber nadakpan kay kuwang og “accessories” ang ilang sakyanan apan naisyuhan gihapon og certifications nga wala lang ayoha ang depekto.
Daghang wa makapasar
Sa unang adlaw sa pag-asumir ni Tancinco isip acting chief sa MVIC daghang mga pasaheroan ang wala makapasar sa inspection.
“Sa lima ka PUJ nga gidala diri ug gi-inspection upat ang wala makapasar sa inspection,” matud ni Tancinco.
Pwerteng daghana nga susihon sa mga vehicle inspectors. Apil niini ang mga suga sama sa headlights (low ug high), signal lights, brake lights, hazard lights, side mirrors, front mirrors, hand brake, mga seat belts, lingkoranan ug daghan pa.
Suga ug handbrakes
Daghan sa mga public utility vehicles, ilabi na mga PUJ’s, ang gubaon na kaayo ug dili na maniga ang suga. Daghan pa sa mga PUJ’s, ilabi na ang mga multicab walay mga hand brakes.
Ang lagda mao nga ang mga sakyanan nga walay hand brake kinahanglang i-impound ug unya ra i-release kun makorehian na ang depekto.
Samtang daghan ang nalipay sa pahibalo ni Tancinco nga estriktohon na ang inspection, naguol usab ang mga drayber ug tag-iya sa sakyanan.
Tulubagon sa drayber
Si Rudy Laconsa, opisyal sa Alyansa sa Nagkahiusang Drayber Alang sa Reporma (ANDAR), misugyot nga dili unta ang mga drayber maoy dakpon kun ang sakyanan nga ilang gimaneho wala makatuman sa lagda. Apan si Tancinco mipasabot nga ang Republic Act 4136 kon Transportation and Traffic Code naglatid nga ang mga drayber maoy kinahanglang mosusi sa sakyanan nga ilang imaneho kung kompleto sa gikinahanglang kahimanan.
Sagad sa madakpan mao ang depektosong mga suga, ug duna say mga drayber nga moinsister sa mga road law enforcers nga dili ang ilang driver’s license ang kuhaon kondili ang mga plate number na lang.
Sayop nga switch
Ang mga sakop sa LTO Task Force Alpha nga aktibo nga mitabang sa pagpatuman sa lagda sa trapiko misugyot nga unta apilon sa pagtan-aw sa mga inspectors sa MVIC ang sayop nga paagi pagbutang og switch sa suga sa ubang sakyanan.
Dunay ubang sakyanan nga managlahi ang switch sa headlights ug tail lights maong dunay higayon nga mga drayber dili makapasiga sa suga sa luyo ug anha ra mopasiga kun sitahon na sa mga enforcers.
Ang tukma nga paagi mao nga usa ra ang switch sa headlights ug tail lights. Apil nga susihon didto sa MVIC mao ang brakes sa sakyanan. Dili makapasar sa inspection ang sakyanan kun dili maayo mogunit ang brakes.
May sindikato
Usa ka road enforcers nga sakop sa Task Force Alpha nahibulong pag-ayo kay usa ka drayber nga iyang nadakpan sa miaging gabii nakamaneho sa pagkuha pagbalik sa iyang lisensya nga wala gipaayo ang pundido niyang suga.
Nasayran sa Banat-Manobela nga dunay mga sindikatong naglihok sa LTO nga kusog kaayo mosundog sa mga pirma sa mga kawani nga nadestino sa MVIC ug ipatoo nilang napaayo na ang depektoso nga suga pinaagi sa pagbayad og P50.
Kadtong mga sakyanan nga magkinahanglan nga mopa-inspection sa MVIC mao kadtong nadakpang depektoso ang accessories ug kadtong paingon na nga ipa-renew ang rehistro. (BANAT NEWS)
- Latest
- Trending