5-anyos gikan daycare center naligsan sa bus patay

CEBU, Philippines - Patay ang 5-anyos nga batang babayeng tinun-an sa daycare human kini maligsi og bus pasaheroan sa iyang paglabang sa karsada paingon na untang mopauli gikan sa iyang klase sa sitio Baklayang-Gamay sa barangay El Pardo sa lungsod sa Boljoon kagahapon sa alas 11:45 sa dayon nang udto.

Ang bata giilang si Jeven Andrie Sestoso Acedo, 5, nagpuyo sa maong lugar ug tinun-an sa daycare sa barangay El Pardo kinsa gisuwayan pa unta pagdala sa tambalanan sa dakbayan sa Sugbu apan nakabsan kini sa kinabuhi. Nagtingkagol na sa karsel ang drayber sa Sunrays Bus Liner nga si Nonito Talasalan, 47, kinsa mitabang pa unta sa pagdala sa bata sa tambalanan. Matud ni PO1 Lord Canada sa Boljoon Police Station dihang nahinabi sa Banat News ang bata kalit milabang sa dalan samtang ang apohan nagpaabot sa sukli sa ilang pleti sa traysikol.

Naatol usab nga maoy paglabay sa bus gikan sa siyudad sa Sugbo paingon sa lungsod sa Santander ug maayong pagkaigo sa bata ug nalatayan sa luyong ligid sa maong bus.

Si Talasalan midala sa bata sa Rural Health Unit sa lungsod sa Boljoon apan tungod kay wala na kini panimuot ug nagkadugo gibalhin kini sa tambalanan sa dakbayan sa Sugbo apan namatay kini. (BANAT NEWS)