Pastor Quiboloy mosuporta ni Gwen
CEBU, Philippines - Subling gipadayag ni Pastor Apollo Quiboloy ang iyang suporta sa tinguha ni Gob. Gwendolyn Garcia nga mopapili sa pagka-senador sunod tuig nga eleksiyon.
Kini atol sa panagkita ni Quiboloy ug Garcia sa Cebu International Convention Center niadtong Domingo sa hapon atol sa Global Thanksgiving and Worship Presentation sa Kingdom of Jesus Christ. Si Garcia ug Cebu City Mayor Michael Rama ang dinapit ni Quiboloy atol sa kalihukan ug gani gihatagan pa sila og kahigayunan nga makapadangat sa ilang mensahe.
Atol sa iyang pakigpulong, gipaila ni Rama si Garcia nga sunod senador. Sa iyang bahin si Garcia nipadayag usab sa iyang kalipay nga nitambong sa maong kalihukan.
Giapil ni Quiboloy sa iyang pangaliya nga hatagan sila si Garcia ug Rama sa kusog alang sa pag-alagad sa katawhan.
Atol sa ilang pribadong tigum, matud pa ni Garcia nga samang suporta ang giluwatan ni Quiboloy ngadto kaniya atol sa una nilang panagtagbo didto sa pinuy-anan sa pastor sa dakbayan sa Davao sa niaging buwan. Si Quiboloy ang giingong “Anointed Son of God” adunay milyones ka mga sumusunod sa tibuok kalibutan.
Mokabat sa 10,000 ka mga tawo ang nanambong sa kalihukan sa CICC sa dakbayan sa Mandaue niadtong Domingo apil na ang mga sakop gikan sa mga silingang dapit sa Sugbo. (BANAT NEWS)
- Latest
- Trending