Sinugboanong pinulongan subject na sa eskuylahan

CEBU, Philippines - Sa K to 12 nga sistema sa edukasyon karon, himoon na nga usa ka subject sa elementarya ug sekondarya ang Sinugboanong pinulongan matud pa ni Regional Director Camelita Dulangon sa DepEd 7 kagahapon.

Sa maong subject itudlo sa mga estudyante ang hustong han-ay sa pagpamulong ug pagpanuwat og Sinugboanon ingon man ang tukma nga espeling sa mga pulong sa maong sinultihan.

Matud pa ni Dulangon nga ang mga opisyal nga nahimong haligi sa pinulungang Sinugboanon sama kang Mayor Adelino Sitoy sa Cordova ug    uban  pa mogama og Dictionary nga aprobado   sa DepEd aron maoy himoong sumbanan   sa espeling sa mga pulong nga Sinugboanon.

Ang ubang mga subject sama sa Science, Mathematics, magpabilin gihapon nga Inenglis apan palikayan na ang mga higpit nga pamaagi sama sa pagpamulta og kuwarta niadtong mga estudyante nga di mosulti og Iningles sa klase.

Matud pa ni Dulangon nga gipahunong na ang maong praktis sa ubang eskuylahan ug kutob sa mga magtutudlo nga molapas niini mag-atubang og imbistigasyon sa mga kadagkoan sa edukasyon.

Nasuta matud pa ni Dulangon nga kasagaran sa mga estudyante karon maglisud na sa pagsulti ug   sa pagsuwat og Sinugboanon nga mga pulong. Sa pagsuwat og Sinugboanon, dili lamang mga batan-on kundi bisan mga hamtong ug propesyonal, magkamuritsing lang ang agi sa pagpanuwat og Sinugboanon nga pulong nga maoy naghatag og labad sa ulo sa mga editor sa mga pamantalaang Sugboanon.

Ang nakapait matud pa ni Dulangon kay daghan kaayong gradwado karon nga pasultihon ug pasuwaton og Sinugbuanon maglisud,   sa Inenglis maglisud, sa Tinagalog maglisud, busa nahimong anugon ang ilang pag-eskuyla kay walay solidong matang sa pinulongan nga ilang nakat-onan nga gigamit sa inadlaw-adlaw nga panginabuhi. (BANAT NEWS)