Pres. sa Filinvest nakigkita ni Gwen

CEBU, Philippines - Gipangunayan sa dakong opisyal sa Filinvest Development Corporation ang pagpakigkita sa gobernador sa lalawigan sa miaging adlaw aron mapirmahan dayon ang kontrata sa negosyo nga tukoron sa nahauna sa yuta sa lalawigan.

Si Josephine Gotianun Yap, presidente ug Chief Executive Officer sa FILINVEST Development Corp.mihatag  og kurtesiya kang Governor Gwendolyn Garcia sa tinguha nga sa labing dali nga panahon masugdan pagpatuman   ang kontrata sa kagamhanan sa lalawigan ug FILINVEST.

Kini may labot sa tukoron nga Business Process Outsourcing (BPO) Complex    sa 1.2 ektaryas nga luna nga gipanag-iya sa Kapitolyo sa Salinas Drive, Barangay Lahug , dakbayan sa Sugbo nga kanhi nahimutangan sa Bagong Buhay Rehabilitation Center.

Matud pa ni Yap nga ilang gikalipay ang pagpakigtambayayong sa kagamhanan sa lalawigan sa Sugbo ug dako kaayo ang iyang garbo nga motukod og proyekto uban sa probinsiya tungod   sa kadako nila og pagsalig kang Gobernador   Garcia.

Ang Filinvest maoy midaug sa dayag ug walay trampas nga subasta sa miaging buwan sa tanyag nga P2 bilyones nga  kantidad sa upat ka tower nga tukoron sulod sa upat ka tuig.

Gipaabot usab nga binilyon ka pesos ang kitaon sa kagamhanan sa lalawigan sa maong proyekto pinaagi sa abang ug porsiyento sa kitaon sa Filinvest. (BANATNEWS)