Magbabalaod sa Japan nakigkita ni Gwen

CEBU, Philippines - Gumikan sa kaikag bahin sa paspas nga paglambo sa lalawigan sa Sugbo usa ka magbabalaod sa Japan miduaw sa buhatan sa gobernador sa Kapitolyo sa miaging Biyernes.

Si Assemblyman Naotoshi Sugawara   sa Kanagawa Perfecture sa Japan nakigtagbo kang Governor Gwendolyn Garcia ug nagsusi bahin sa ekonomiya sa lalawigan.

Atol sa ilang panagtagbo nahisgutan ni Sugawara ang iyang tinguha sa pagpalambo sa relasyon tali sa nasud sa Japan ug sa Pilipinas ilabina na gayud ang Sugbo.

Nasayran nga si Sugawara    mianhi sa nasud, sa unang higayon sa tinguha nga makataak dinhi sa Sugbo ang labing mahinungdanong lugar alang kaniya dinhi sa Pilipinas.

Gumikan sa iyang nasaksihan dinhi sa Sugbo, si Sugawara misaad nga iyang sultihan ang iyang gobernador sa Japan

Matud sa opisyal sa Japan iyang hangyoon ang ilang mga dagkong opisyal nga magpahigayon sila og trade mission dinhi sa nasud   alang sa dugang ikalig-on sa kadugtongan sa Japan ug sa Pilipinas.

Apan ang pagtukod og panag-igsoonay o sisterhood tali sa Sugbo ug sa ilang lalawigan sa Japan maoy usa sa labing mahinungdanon, matud pa niya. (BANATNEWS)