Mga hepe nagmulo sa budget

CEBU, Philippines - Matag hepe sa departamento sa kagamhanan sa dakbayan sa Sugbo nagmulo gumikan sa kanihit sa budget nga gitugot kanila sa konseho niining tuiga.

Usa niini mao ang hepe sa Cebu City Agriculture Department (CAD) kinsa nagkanayon nga wa silay laing mahimo gawas sa paghatag sa ilang serbisyo ngadto sa katawhan subay sa budget nga gitugot kanila

Sumala ni Joey       Baclayon, ang hepe sa buhatan sa agriculture department nga sila na lay mohimo og mga pamaagi aron ang gigahin kanilang salapi nga gastohonon sa departamento ning tuiga makasulbad sa ilang panginahanglan.

Sumala ni Baclayon nga gikan sa P38 milyones nga giduso nilang budget, P13 milyones ray gitugot sa konseho.

Matud pa niya nga nagbaha ang ilang mga programa karon ilabi na sa paghatag og mga training ug mga seminar ngadto sa mga mag-uuma.

Apan tungod kay gilaslasan man og maayo ang ilang budget, dili na sila makakuha og mga resource speaker.

Hinuon miingon si Baclayon nga kadtong mga mag-uuma nga nakaagi na og training sa miaging tuig unya makaantigo manulti , mao nalay ilang gamiton sa ilang mga training ug seminar nga himuon karong tuiga.

Naapektohan usab ang programa sa CAD kalabot sa pagpananom og kahoy hinungdan nga modangop sila karon ngadto sa nasudnong kagamhanan aron madugangan ang ilang mga materyal.

Dugang pa ni Baclayon nga importante gyud kaayo ang mga training gumikan kay gawas sa lecture, motudlo usab sila og aktuwal nga pagbansay bansay sa mag-uuma.

Matud pa niya nga sa miaging tuig, kapin sa 2,000 ka mag-uuma sa bukirang bahin sa siyudad sa Sugbo ang nakabenepisyo sa ilang mga seminar kung diin ang uban niini milambo na sa ilang pagpanguma karon.(/WC) (BANATNEWS)