Hulga sa Mactan Channel

CEBU, Philippines - Dakong hulga sa panglawas sa katawhan ug sa kinaiyahan sa Mactan Channel tungod sa mga basura ug hugaw sa tawo nga gilabay dinhi sumala pa sa tinugyanan sa kinaiyahan.

Nunot niini ilusad unya sa Department of Environment and Natural Resources (DENR) 7 ang Operation Dakop ug awareness campaign ug cleanup drive sa publiko karong Septiyembre 24.

Si Engineer Amancio Dungcoy nga maoy Ecological Solid Waste Management coordinator sa DENR-7 namahayag niini sa mga tigbalita sa miaging adlaw.

Usa sa mga tinubdan sa maong hugaw mao ang Butuanon River nga namatikdan nilang nagkagrabe ang kahimtang.

Dugang pa niya nga base sa mga pagtuon nga ilang gihimo daghang mga pabrika ug uban pa nga mga establisamento nga giagian sa maong suba ang nakatampo sa maong suliran.

Sumala pa niya nga makurihian ra kini kung higpitan ang pagpatuman sa balaod ilabi na sa Environmental Laws ngadto sa mga pabrika.

 Mas naglisod ang DENR sa pagpasunod sa balaod sa mga molupyo daplin sa sapa nga hangtud karon wala gihapon magpakita og kaluoy sa maong sapa ug wala mahadlok sa resulta sa inadlaw-adlaw nilang paglabay og basura ug hugaw.

Kini luyo sa paghigpit sa mga lokal nga kagamhanan sa pagpatuman sa Solid Waste Management. (BANATNEWS)