Congressman PJ Garcia mipundo'g P5M sa VSMMC

CEBU, Philippines - Lima ka milyon ka pesos nga pundo, ang gideposito na ni Congressman Pablo John Garcia sa Vicento Sotto Memorial Medical Center (VSMMC) alang sa medical assistance sa mga Sugbuanon sa tresiro distrito.

Kini ang gitug an ni Glen Baricuatro ang Chief of Staff ni Congressman Pablo John kinsa nagkanayon nga tanang mga Sugboanon sa ikatulong distrito sa Probinsya sa Sugbo maoy unang maka benepisyo sa medical assistance nga gigahin sa kongresista.

“Kaning utilization sa atong funds sa Vicente Sotto maoy kusog kaayo kay daghan man gyud ang magpa-hospital,” sigun pa ni Baricuatro.

Sa samang higayon iya usab nga gipahibawo nga dili gayud maglisod ang mga Sugboanon sa ikatulo nga distrito sa pagkuha sa mao unya nga medical assistance kay aduna may kasabotan ang kongresista sa 3rd district ug mga opisyales sa maong hospital nga magbutang gyud ang congressman og kawani sulod mismo sa maong hospital aron maoy duolon sa mga paryente.

“Kung simbako lang aduna silay bation, simbako maaksidente unya adto lang sa Vicente Sotto magpa-admit kay atong pundo naa raman ngadto sa Vicente Sotto. Atong pahimuslan ang serbisyo nga gihatag ni Congressman Garcia diha sa 3rd district pinaagi sa pagpahimos sa free nga medical assistance nga kung anha lang ma-admit sa Vicente Sotto unya mas sayon kung moduol lang sila diretso sa atong medical assistance desk nya labing maayo kung mada pud nila ang ilang Philhealth card nga gihatag ni Governor Gwen Garcia sa mga taga third district,” sigon pa ni Baricuatro.

Midugang si Baricuatro nga lakip usab sa gigahinan og pundo ni Congressman Pablo John mao ang burial assistance sa mga kabus nga mikabat og P2 mil ngadto sa P3 mil matag usa.  - BANAT NEWS