Bag-ong power substation sa Naga gibuksan

CEBU, Philippines - Gipahibalo sa National Grid Corporation of the Philippines (NGCP) nga nagsugod na og transmit og suplay sa kuryente ang bag-ong P600 milyones nga Naga Substation sa barangay Colon, dakbayan sa Naga sugod niadtong Pebrero 26.

Ang maong suplay sa kuryente gikan sa Kepco-Salcon Power Corporation nga gisugdan og transmit alas-12:44 sa kaadlawon makahatud og 200 megawatts capacity nga ipadala sa Visayas power grid ngadto na sa mga power providers.

Ang maong bag-ong substation maoy magkonektar sa duha ka 100 MW generator units sa KSPC Salcon Power Plant nga gibana-banang 500 metros gikan sa maong substation.

Gipaabot usab nga ang maong substation magamit gihapon sa pag-transmit pa sa umaabot nga dugang load sa kuryente sa Visayas power grid tungod kay kini adunay kapasidad nga maka-transmit og 836 MVA.

Ang pagbukas sa maong substation niadtong milabay’ng semana gihimo agi og pagpangandam sa pagsugod og baligya sa KSPC plant sa ilang ma-produce nga power nga aktwal usab nga gisugdan niadtong Pebrero 28. 

Ang unang 100 MW unit nagsugod na og dispatsar og power samtang ang ikaduhang 100MW unit gipaabot nga magsugod usab og operate karong Mayo 31, 2011 nga diin sa susamang bulan usab himuon ang final phase sa pagbalhin sa termination points sa karaang Naga Power Plant Switchyard diha sa bag-ong substation.

Ang katukoran sa maong substation natigayon pinaagi sa joint venture sa ABB Inc. ug AER Construction. - BANAT NEWS