Sindikato sa 'Child porno' gisubay

CEBU, Philippines - Gisusi sa kapulisan ang report nga posibleng sindikato ang midagit ug mipatay sa tinun-an sa grade one sa Calajoan Elementary School sa lungsod sa Minglanilla nga si Ellah Joy Pique niadtong Martes sa hapon.

Si Sr.Insp. Ma. Theresa Macatangay ang pangulo sa Intelligence Research Section (IRS) sa Regional Intelligence Division (RID)-7 nagkanayon nga base sa nakuha nilang impormasyon sa ilang gipadalang imbestigador sa Sayaw Beach Resort sa barangay Sayaw lungsod sa Barili nasuta nga dili lang duha ka tawo kundili tulo ka tawo ang nakit-an sa area sa wala pa napalgi ang patay’ng lawas ni Pique.

Matud ni Macatangay nga dunay duha ka saksi nga ilang nakuhaan og pamahayag, usa niini mananagat ug usa nag-jogging niadtong higayona.

Ang mananagat mitug-an nga iyang nakit-an nga dunay tulo ka tawo nga nagdala og flash light nga giiwag sa daplin nianang pasado alas-4 sa kaadlawon sa adlaw’ng Miyerkules samtang ang nag-jogging nga lalaki mitug-an usab nga iyang napadul-an ang usa ka tawo ug nadunggan ang tingog sa usa nga tono og usa ka mahuyang.

Tungod niini nagkanayon si Macatangay nga ila karung gitutokan ang Human Trafficking sanglit kusog kaayo karun ang child pornography. Gidudahang posibleng ang mga Filipino nga miyembro maoy mangita og biktima nga ilang ibaligya ngadto sa mga langyaw’ng pedophiles.

Matud ni Macatangay nga nakig-alayon na sila sa International Justice Mission aron maoy mosusi sa ilang records sa mga pedophiles ug sex offenders dinhi sa Sugbu nga mamiktima og mga bata.

Ila na sab gi-coordinate ang Land Transportation Office (LTO) pagsusi sa tanang number nga 679 sa tanang pribadong sakyanan sanglit wala man makuha sa saksi ang prefix (letra) niini.

Si Dr. Nestor Satur sa PNP Crime Laboratory nga nahinabi sa Banat News mibutyag nga subay sa pag-awtopsiya niya sa patay’ng lawas ni Pique nasuta nga duna kini mga bun-og sa bukton, gisi sa tuong bahin sa ubos sa ngabil ug sa ubos ug dunay gamay nga bun-og ug gisi ilawom sa ngabil.

Matud ni Satur nga posibleng misiyagit ang bata unya gustong pahilomon sa midagit kaniya hinungdan nga dunay bun-og sa iyang duha ka bukton.

Nagtuo si Satur nga gumikan sa bun-og nga iyang nakita sa bata, dako iyang pagtuong dili lang usa ka tawo ang migunit sa bata ug posible duha.

Matud niya nga ang gisi ug bun-og sa tuong suwang sa bata posibleng binunalan og gahi nga butang. Nagtuo siyang misukol bisan pinaagi sa pagpaak ang bata ngadto sa mga mipanamastamas kaniya hinungdan nga kini posibleng gibunalan og gahi nga butang.

Dugang ni Satur nga kun gidagit ang bata alas-4 sa hapon nagtuo siyang gipakaon pa kini nianang pagka alas-siyete sa gabii sanglit base sa iyang pagsusi gamay nalang ang kinaon niini sa tiyan. (BANAT NEWS)