Job order employee kuhaa'g 2 pistola

CEBU, Philippines - Usa ka job order employee sa lungsod sa San Fernando nagtingkagol sa karsel human masikop ug nakuhaan og armas pasado alas-10 sa buntag kagahapon sa barangay Sangat lungsod sa San Fernando.

Ang nasikop mao si Ruben Cabagti, 22, molupyo sa maong lugar diin nakuhaan og duha ka armas nga pulos kalibre .45 nga adunay mga bala apan wala’y lisensya.

Matud pa sa hepe sa kapolisan sa lungsod sa San Fernando nga si Sr. Insp. Carlos Reyes nga adunay molupyo usab sa maong barangay ang mipadangat og reklamo kang Sr. Supt. Erson Digal, ang hepe sa kapolisan sa lalawigan sa Sugbo sa miaging semana.

Matud pa sa reklamante nga si Cabagti nga usa ka job order employee kanunay niining makit-ang magpunay og dala-dala og armas sa ilang lugar hinungdan nga gipasusi kini ni Reyes.

Tuod man sa gipahigayong hearing sa barangay hall sa maong barangay diin gitambongan kini og duha ka polis naaktuhan nila si Cabagti ug nagbitbit og clutch bag ug dihang ilang gihiling ang duha ka armas maoy sulod niini.

Matud pa ni Reyes nga ang usa sa mga pistola adunay pito ka buhing bala samtang ang usa usab niini adunay lima ka buhing bala. (BANAT NEWS)