Labra himuon DCDA sa CCPO

CEBU, Philippines - Gipatawag kagahapon sa buntag sa buhatan ni Police Regional Office-7 director Chief Supt. Ager Ontog ang Deputy City Director for Operation sa Cebu City Police Office (CCPO) nga si Supt. Paul Labra II nga bag-o lang nahibalik dinhi sa Sugbu human nag-schooling didto sa Campo Crame.

Si Ontog sa dihang nahinabi sa mga tigbalita nagkanayon nga iyahang gipatawag si Labra ug gitanyagan og mas taas nga posisyon sa CCPO aron maoy makaabag kang Sr. Supt. Melvin Ramon Buenafe.

Sa nasayran ang kasamtangan nga Deputy City Director for Administration (DCDA) sa CCPO nga si Sr. Supt. Elesio Castronuevo gikatakda nang moretiro sa katungdanan karung mosunod nga mga adlaw.

Matud pa ni Ontog dili ikalimod nga maayong gipakita nga performance ni Labra sukad sa iyang paglingkod isip (DCDO) tungod sa daghan niining kalampusan.

Sumala pa ni Ontog nga sukad siya nahimong pangulo sa kapulisan sa Central Visayas nakita niya ang maayong labok ni Labra hinungdan nga angayan lang kining hatagan og taas nga posisyon.

Si Labra sa iyang bahin nga nahinabi sa CCTN News nasurpresa sa kasayuran nga iyang nakuha sanglit, matud pa niya nga sa ilahang panagtagbo ni Ontog wala kini maghisgot nga siya ibutang sa mas taas nga posisyon diha sa CCPO.

Kalmadong mipasalamat ug namahayag si Labra nga kung siya gyud ang itudlo sa PRO-7 andam siyang modawat niini ug mipasalig nga motrabaho lang siya sa mga gimbuhaton diha sa CCPO.

Sa nasayran niadtong milabay’ng buwan milarga si Labra sa kaulohan aron motungha sa Campo Crame diin mao kini ang usa sa mga gikinahanglan aron pagsaka sa iyang ranggo ngadto na sa pagka Senior Superintendent. (BANAT NEWS)