Ralota, Manatad, Casul ug Mercado midaog pagka-ABC president

CEBU, Philippines - Bisan sa daghang mga alegasyong adunay mga nanghitabong pinalitay og botos ug giingong pag-apil apil sa mga dagkong politiko sa gihimong eleksyon sa Association of Barangay Councils sa Metro Cebu malampusong natapos ang maong kalihukan kagahapon.

Sa dakbayan sa Sugbu, ang barangay kapitan sa T. Padilla nga si Michael Ralota maoy nakadaug pagka-presidente sa Association of Barangay Council –Cebu City Chapter uban sa 58 botos ug iyang napilde ang kapitan sa Busay nga si Eliodoro ‘Yody’ Sanchez nga nakakuha lang og 18 botos.

Gipahigayon kagahapon sa buntag ang eleksyon sa ABC sa Cebu Grand Convention Hall ug nahuman sa alas tres sa hapon nga gitambongan sa 77 ka mga kapitan.

Napili nga pagka-bise presidente ang kapitan sa Capitol Site nga si Manuel Guanzon nga nakalangkat og 49 botos diin ang kaatbang niini nga si Dave Tumulak sa Basak Pardo nakahipos lang og 27 botos.

Tulo lang ka kapitan ang wala makatambong ug kini naglangkob nila ni Rita Sabal sa barangay Babag, Rey Allera Cañada barangay Day-as ug Jovito Taborada sa barangay Lahug.

Gipadayag usab ni Ralota nga mapasalamaton siya kang Kongresista Tomas Osmeña nga maoy nag-endorsar kaniya. Subling gihimakak ni Ralota ang isyu nga matud pa dunay nahitabong vote buying ngadto sa mga kapitan.

Gipasalig sa bag-ong natuboy nga presidente sa ABC nga usa sa tagaan niya og prayoridad mao ang pagpaayo sa mga kadalanan sa kabukiran.

Samtang midaog sa piniliay sa dakbayan sa Mandaue isip ABC-president si Kapitan Ernie Manatad nga kanhi executive secretary ni Mayor Jonas Cortes nga sa sayo pa gituboy sa mayor.

Walay nakig-atbang kang Manatad sa maong posisyon gikan sa 27 ka mga barangay kapitan samtang napiling bise presidente sa liga mao si Ibabao -Estancia kapitan Carmelino Cortes Delmar Jr.

Samtang sa piniliay usab sa Consolacion midaug si barangay kapitan Marilou Casul sa Poblacion Oriental ug iyang gipildi ang higpit niyang kaatbang nga si Kapitan Glesilda Bello sa barangay Tayud.

Sa 21 ka mga kapitan sa maong lungsod 17 ang mibotar pabor kang Casul, duha ang mi-abstain ug tulo usab ang mi-walkout sa wala pa usab masayring hinungdan.

Samtang sa dakbayan sa Lapulapu, si Kapitan Leo Fernan Mercado, nga nakakuha og 27 botos ang midaog, samtang ang bise presidente niini mao si Elias L. Berdin, nga nakakuha usab og 27 botos.  - Sanden Anadia ug Romeo Limpangog (BANAT NEWS)