Gidunggab og botelyang buak sa kainom patay

CEBU, Philippines - Patay ang usa ka lalaki human kini gidunggab og buak nga botelya sa iyang amigo dihang nagkalalis samtang nag-inom pasado alas 4:00 sa hapon sa milabay’ng adlaw.

Ang biktima mao si Cornelio Cardibal, 38, taga Southwind Subdivision, sa barangay Dumlog sa dakbayan sa Talisay samtang ang nagdunggab kaniya, iya ra usab kainom nga si Anthony Valmore, 24, taga sitio Kimba, barangay Cansojong sa maong dakbayan.

Sumala pa ni SPO1 Oliver Dacua dihang nahinabi sa Banat News ang managhigala nag-inom niadtong tungura apan kalit lang nagkasumpaki ug diha-diha gibuak sa suspetsado ang walay sulod nga botelya dayong duslak sa buak nga bildo ngadto kang Cardibal makadaghang higayon.

Nakaangkon og samad dinunggaban ang biktima sa nagkadaiyang parte sa lawas, lakip na ang tuong bahin sa iyang dughan ingon man sa tiyan ug daling gidala sa Talisay City District Hospital apan tungod sa grabeng kadaut nga nahiaguman niini, gidala ra usab kini sa Don Vicente Sotto Memorial Medical Center.

Dugang pa ni SPO1 Dacua nga ang pag-umangkon sa biktima nga miadto sa ilang buhatan mipahibawo kanilang pipila ka oras ang milabay namatay ang iyang uyoan sa tambalanan.

Ang suspetsado nadakpan dayon sa mirespondeng mga polis ug gikatakdang pasakaan og kaso. (BANATNEWS)