- Ni Elly Bolonos () - July 4, 2009 - 12:00am

CEBU, Philippines – Gihulagway sa Dangerous Drugs Board (DDB) ang kadaghanan sa mga opisyal sa kabarangayan sa dakbayan sa Sugbu nga mga salbahis ug mga bakakon.

Kini tungod sa pagsumitir og dili tinuod nga report ngadto sa Department of Interior and Local Government (DILG) may kalabutan sa anti-drug program niini.

Matud pa ni DDB undersecretary Paul Clarence Oaminal nga siya mismo nakaobserbar sa Barangay Anti-Drug Abuse Council (BADAC) report sa kabarangayan.

Giklaro ni Oaminal nga dunay mga BADAC reports nga nangangkong duna sila’y gipahigayong seminar ug ubang anti-drug activities sa ilang lugar apan sa dihang iyang gisusi wala kini kamatuuran, matud pa niya nga gihimo-himo lang kini sa mga barangay officials aron makatuman sa gipangayo sa DILG kanila.

“Salbahis kaayo ning mga barangay officials, mo-submit sila og BADAC report sa DILG pero puro bakak, nag-meeting sila, nag-seminar kuno pero wa diay to,” sumala ni Oaminal.

Tungod niini gisugyot sa DDB vice chairman ngadto sa DILG nga gikinahanglang pa-notaryuhan sa mga barangay officials ang ila unyang iduso nga report.

Kini aron dili makapangulipas ang hingtungdang mga opisyal kung moduso og minao-mao nga BADAC report ngadto sa DILG aron kung masakpang hinimo-himo ra ang ilang report iyaha kining pasakaan og kasong perjury ug falsification of public documents.

Gitataw ni Oaminal nga seryoso sila sa maong bahad tungod kay tinguha sa DDB nga matabangan ang mga sakop sa BADAC sa matag barangay sa dakbayan pagtuman sa ilang tahas.

Kini pinaagi usab sa pagpasiugda og BADAC reactivation seminar uban sa pagpakig-alayon sa mga sakop sa City Anti-Drug Abuse Council (CADAC). – BANAT NEWS   

BADAC DEPARTMENT OF INTERIOR AND LOCAL GOVERNMENT DRUG ABUSE COUNCIL DRUGS BOARD GIHULAGWAY GIKLARO KINI OAMINAL PAUL CLARENCE OAMINAL