Sex video ni Dr. Kho ug katrina ipasakmit

CEBU, Philippines – Gimandoan sa Cebu City Anti Indecency Board (CAIB) ang kapolisan pagsakmit ug pagdakop sa mga nag-display ug nagbaligya sa mga pirated DVD ug VCD sa napublikar nga sex scandal tali nila ni Dr. Hayden Kho ug model actress nga si Katrina Halili.

Matud ni Dr. Rene Josef Bullecer, tsirman sa CAIB niadto pang miaging semana gi-alerto nila ang kapolisan human sila unang makadawat og taho sa pagkapublikar sa maong sex scandal.

Gipasabot ni Bullecer nga subay sa ordinansa sa dakbayan sa Sugbo ang City Ordinance 1408 dunay gahum ang kapolisan pagdakop, pagsakmit sa mga ipang-display ug ipamaligya nga mga pirated DVD ug VCD ilabina sa mga law-ay’ng pasundayag.

Gawas niini, gibutyag ni Bullecer nga ila usab dayong gisuwatan sa CAIB ang chairman sa Optical Media Board (OMB) nga si Edu Manzano nga giawhag paghimo og konkretong lakang nga mapugngan ug dili gyud makakatap sa tanang mga lugar dinhi sa nasud ang sex video.

Apan gikasagmuyo ni Bullecer nga na-upload kini karon sa internet ug mikatap na sa tanang mga dapit dinhi sa kalibutan.

Nunot niini gitinguha usab karon ni Bullecer nga ipasusi ang personal nga pagkatawo ni Dr. Kho kun maayo ba kini og rekord ingon man masuta usab kun tinuoray ba kining lisensyado sa pagka-doktor.

Si Bullecer nga usa usab ka doktor mihulagway nga dili usa ka normal nga pagka-tawo ang pag-upload sa internet aron mapublikar sa tibuok kalibutan ang pagpakighilawas niini ngadto sa usa ka babaye susama sa napublikar nga eskandalo nilang Kho ug Halili.

Giklaro hinuon ni Bullecer nga wala kini kalambigitan sa malpractice pagka-doktor ni Kho apan isip mga doktor katungod usab nila ang pagpreserbar sa moral ethics nga mao ang dili paghimo og mga buhat nga makadaot ngadto sa isig ka pasyente o tawo. - Darrel A. Carumba (BANAT NEWS)