2 German gideklarar nga 'persona non grata'

CEBU, Philippines – Duha ka German ang gideklarar sa konseho sa lungsod sa Alcoy nga “persona non grata” tungod sa gihulagway sa mga residente nga mga hambugero, makalagot ug walay hustong pamatasan diha sa ilang dapit sa sitio Cancaya, sa barangay Poblacion.

Ang konseho mipasar og resolusyong nagdeklarar nilang Thomas Hudak ug Wolfgang Muller nga mga “undesirable aliens” subay sa reklamo sa mga residente nga nagkahiusa pagsang-at sa maong reklamo.

Ang mga residente mipasangil nga singhagan sa duha ang mga bata ug hasta ang mga ginikanan ilahang balikason sa pag-ingon og “stupid shit,” kini sumala pa sa report sa konseho sa committee on laws.

Apan si Mayor Nicomedes Delos Santos nagkanayon nga makaapekto sa ilang turismo kung ideklarar dayong “persona non grata” ang duha tungod lang sa maong reklamo.

Matud ni Delos Santos iyahang ipaabot ngadto sa Cebu Provincial Board committee on tourism and international affairs nga gipanguluhan ni PB member Agnes Magpale ang maong problema.

Nangangkon ang mga residente nga nausab ang kamalinawon sa ilang dapit sukad nga naabot ang duha ug namuyo sa ilang lugar.

Sa hiniusang pamahayag sa mga residente kini nagkanayon: “driving their vehicles in complete disregard of the safety of children, shouting at children and even their parents as “stupid shit” for allowing the kids’ guardian to wander and play at the dirt road and near premises and passing by dirt road during nighttime or wee hours of the morning with loud engines of their motorcycles disturbing the sleep of residents.”

Ang duha ka langyaw gipatawag na sa mga opisyales sa lungsod kabahin sa reklamo apan pulos mihimakak sa pasangil ug misumbalik sa mga lumad nga nagmugna-mugna lang og estorya batok kanila.

Inabagan sa ilang mga abogado, si Muller mibutyag nga nagpatrabaho siya kaniadto sa ilang balay ug ang gisuhulan mga residente sa barangay apan nakahukom siyang ipahunong kini human sa pagsang-at og reklamo.

Mikutlo usab ang duha sa Local Government Code of 1991, nga ang lokal nga kagamhanan dili makadeklarar kanila nga mga undesirable aliens tungod kay di sila mga “foreign dignitaries o ba kaha sakop sa diplomatic mission sa ilang nasud nga kinahanglang mosunod sa Article 9 sa Vienna Conventions bahin sa Diplomatic Relations.

Nangangkon usab silang di sila tanos mogamit og pinulungang Englis maong di sila kalitok og “stupid” ug labaw nilang gihimakak ang pasangil nga nagbinastos sila atubangan sa publiko, hubog nga magmaneho sa sakyanan ug pagbiay-biay sa mga residente.

Ang duha miawhag nga ibasura ang petisyon batok kanila sanglit gihulagway nilang kulang sa merito ang maong pasangil. – BANAT NEWS