Batan-on giluba wa katiwas pamahaw
CEBU, Philippines - Wala makatiwas og pamahaw ang usa ka menor de edad human kini dunggaba sa usa ka lalaki diha sa dalan Tres de Abril, barangay Pahina San Nicolas pasado alas 9 sa buntag sa miaging adlaw.
Nadakpan hinuon ang suspek nga si Lucio Rosiana Acosta alyas “Roger” , 40, maoy gitumbok sa 16-anyos nga batan-on, ang naulahi naigo diha sa walang bahin sa lawas ug nalandig sa Cebu City Medical Center.
Kauban sa biktima niadtong tungura ang upat ka uyuan nga nangaon sa karenderya sa nahisgutang lugar ug nagbinayloay og komedya.
Ang suspek nga diha sa atbang gikatahong wala mahimuot kanila ug dihang namiya na ang mga uyoan sa batan-on kalit kining miduol ug gibaharan “huwata ko diha kay balikon tika.”
Ang biktima nga wala makasabot sa gisulti sa suspek wala ra usab manumbaling apan diha na siya nakugang sa pagbalik sa suspek nga may gibitbit nang kutsilyo dayong hansak sa iyaha.
Ang biktima nagtuo lang nga siya gisumbag apan diha nalang siya naratol human makit-ing nag-agas ang dugo sa iyang kilid hinungdan nga nagpakitabang siya sa mga uyoan ug sa mga tanod.
Matud pa ni PO2 Lou Pagara sa Homicide Section sa pakighinabi sa Banat News kasong Frustrated Homicide ang ipasaka sa suspek, dugang pa niya nagsulod-gawas na kini sa prisohan tungod sa kasong pagpangawat. - Lesley Caminade (BANAT NEWS)
- Latest
- Trending