Rama mobiyahe sa Thailand aron pagtambong sa Kyoto declaration
CEBU - Motambong karong adlawa si Cebu City Acting Mayor Michael Rama alang sa usa ka okasyon nga ipahigayon sa siyudad sa Bangkok sa nasud sa Thailand nga gipasiugdahan sa United Nation Center for Regional Development.
Ang kalihukan mao ang pagpinirmahay sa mga mayor sa Asya sa Kyoto Declaration for the Promotion of Environmentally Sustainable Transport in Cities.
Matud ni Rama nga siya igo lang nihulip kang Mayor Tomas Osmeña nga maoy giimbitar alang sa maong aktibidad.
Ang nahisgutang kalihukan magsugod ugmang adlawa ug kini gitakdang matapos karong umaabot nga adlaw’ng Biyernes.
Apan posibleng dili pa mobalik dayon si Rama tungod kay laing kalihukan ang gitakdang tambungan niini karong umaabot Nobyembre 16 hangtud na sa 18.
Ang acting mayor mao gihapon ang mohulip sa mayor sa biyahe unta niini ngadto sa Dubai sa United Arab Emirates alang sa Urban Waterfronts Regional Conference nga ipahigayon sa Hyatt Regency sa maong nasod.
Tungod niini, si Konsehal Hilario Davide III nga maoy kasamtangang acting vice mayor, mao unya ang mohulip sa katungdanan ni Rama.
Wala pa hinuon matino kung kinsa ang mohulip ni Davide isip acting vice mayor ug maoy mo-preside sa sesyon sa City Council ugmang adlawa.
Kini tungod kay si konsehal Nestor Archival nigikan usab kagahapon paingon sa Bangkok, Thailand alang sa pagtambong sa Better Air Quality Conference.
Apan matud ni Sanguniang Panlungsod Secretary Cynthia Kahulugan nga anaa ra nila ni Konsehal Edgardo Labella ug Sylvan Jakosalem depende unya sa masabutan sa mga sakop sa konseho. (BANAT NEWS)
- Latest
- Trending