Listahan sa Chinese products nga may melamine ipapublikar

CEBU - Gihagit ni Cebu City Councilor Christopher Alix ang Bureau of Food and Drugs (BFAD) ingon man ang Department of Health (DOH) nga mopagawas og listahan sa mga Chinese Food ug Milk Products nga gi-ban sa merkado.

Kini aron mahatagan og klarong giya ang katawhan ilabi na sa mga Sugbuanon sa mga produkto nga angayan niining likayan sa pagpalit.

Isip chairman sa Committee on Health sa City Council niingon si Alix nga dili makiangayon sa ubang Chinese Food Products ang gihimo sa BFAD ug DOH.

“Ila man gud nga gi-generalize nga dili paliton ang tanang Chinese Food Products, mas maayo nga ila gyud nga klaruhon…Ang ila man gud nga gipangita kadto lang mga produkto nga dunay melamine content, so, kung wala nganong iapil man,” nagkanayon ang konsehal.

Ang melamine usa ka chemical component nga gipasangil nga nakaingon sa kidney failure sa mga bata human masagol sa gatas sa nasud sa China ug upat ka bata ang namatay samtang libuan ang nalandig sa tambalanan.

Taliwa niini gusto ni Alix nga hinganlan sa BFAD ug DOH ang mga produkto nga gikan sa China nga dunay sagol sa nahisgutang kemikal.

Buot usab sa konsehal nga ibalik sa merkado kadtong mga Chinese food products nga napamatud-ang negatibo sa melamine content. (BANAT)