Nailong anak sa mga sundalo gibisita sa HFI

CEBU - Mga scholar sa Hero Foundation Inc. gibisita sa mga opisyal niini kagahapon sa buntag sa AVR2 sa University of Cebu, Banilad niining dakbayan.

Si Retired Major General Renato Garcia sa Armed Forces of the Philippines (AFP) kinsa Executive Director, Operation sa HFI sa pakighinabi niini sa Banat News kagahapon sa buntag mipasabot nga ang HFI usa ka private foundation nga gipaluyohan sa mga dagkong negosyante kinsa kasagaran nagbase ngadto sa kaulohan ug nagkahiusa sa pagtukod og foundation.

Matud ni Garcia nga ang tumong sa foundation mao ang pagtabang sa mga nabiyuda sa mga sundalo kinsa namatay atol sa pagpahigayon sa ilang trabaho pinaagi sa paghatag og scholarship sa mga anak niini aron makalampos sa ilang pagtuon.

Ang HFI natukod niadtong tuig 1988 apan lakip sa mga nabiyuda sa mga sundalo niadtong tuig 1986 ang nakabenipisyo niini.

Niadtong tuig 1986-1987 adunay daghang mga sundalo nga namatay sa gubat dinhi sa nasud tungod niini si kanhi Chief of Staff General Renato de Villa ubos sa tabang ni Don Jaime Zobel de Ayala mihangyo ngadto sa mga negosyante para matabangan ang mga nabalo sa mga sundawo nga namatay sa gubat.

Si Garcia nagkanayon nga kasagaran sa mga sundalong mga namatay gagmay pa ang mga anak niini ug ang mga asawa usab kasagaran ang walay mga panginabuhian hinungdan nga maglisod gyud kini sa pagpatindog sa pamilya.

Ang HFI adunay gipatunghang sobra sa 1000 ka mga anak sa namatay'ng sundalo.

Ang mga scholar ang hatagan og P8 mil matag semester nga maoy ibayad sa ilang pag-eskwela ug kagahapon gipahibawo ni Retired Brigadier General Manlongat, usa sa mga opisyal sa HFI nga umentohan na ang mga allowance sa scholar gikan sa P8 mil mahimo na unya kining P10 mil.

Ang mga scholar kinahanglan magmentenar og grado gikan sa 80 porsyento pataas ug i-monitor kini sa foundation. (BANAT)