Kagawad, laing duha gibanhigan; 1 patay

Patay ang usa ka tawo ug lain pang duha ang anaa sa kritikal ang kahimtang nga naglakip sa barangay  kagawad sa  dihang gibanhigan sa miaging Domingo sa kaadlawon sa kapistahan sa barangay Cabungahan, dakbayan sa Danao.

Ang namatay mao si Danilo Tortor Lato,  37, minyo, ug  grabeng naangol mao sila si  Kagawad  Lamberto Barbrero Capol, 66, ug Raul  Yap Camanse, 44, ug pulos nagpuyo sa maong dapit.

Ang nakapusil sa tulo ka mga biktima nga mikalas og usa ka  kinabuhi mao si Epifanio Camacho, hingkod ang panuigon ug lumolupyo usab sa maong dapit.

 Si SPO4 Ramerito Ramonida nga nahinabi sa Banat News miingon nga gikainom ni Camacho si Lato atol sa gipasiugdahang disco sa maong dapit isip kabahin sa mga kalingawan nga gipasiugdahan sa kasaulogan sa tinuig nga pangilin sa maong dapit.

Samtang nagpadayon ang ilang panag-inom kalit lang mitumaw ang panaglalis ug si Camacho nga nagluklok diay og armas sa wala mahibaw-ing kalibre ang kalit lang nga namusil ngadto kang Lato.

Nagdali sa pagduol si  Kagawad Barbero Capol, 66,  alang sa paghimo’g pakisusi apan gipusil usab kini sa suspetsado ug naigo ang walang abaga niini.

 Ang ikatulong biktima nga si Raul Yap Camanse, 44,  nga nagtan-aw sa gipasiugdahang disco ang napagan usab sa maong pagpamusil ug naigo kini sa dughan ug bukobuko.

Dali nga gidala ang tulo ka mga biktima sa Danao District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbu apan si Lato   namatay samtang nagpaingon kini sa maong tambalanan.

Matud pa ni SPO4 Ramonida  wala nila maabti ni SPO2 Ramil Oliverio ang suspetsado dihang ilang gitubag ang alarma sanglit dali kining nakasibat pahilayo sa maong dapit kinsa padayon kini nilang gipangita.