Dakay duda sa “beso-beso” sa nagbanging mga lider

Ang pagkadalo sa gahum ug pagka hakog sa dungog maoy gitumbok nga dakung hinungdan kun nganong lisud nga magkahiusa ang mga nagkabangi nga politiko dinhi sa Sugbu.

Mao kiniy giluwatang pamahayag sa tigpamaba sa Archdiocese sa Sugbu Monsenyor Achilles Dakay dihang nahinabi sa Banat News.

Hinuon nanghinaut  si Dakay nga tinud-anay og seryoso ang gipakita nga maayong pagtinagdanay ug sadya nga picture taking tali nila ni Mayor Tomas Osmeña, Gobernador Gwendolyn Garcia ug Lahug barangay captain Mary-Ann delos Santos sa nilabay’ng Sinulog Mardigras ug sa awarding niini niadtong Lunes.

Matud ni Dakay ang pagkamatinud-anon sa mga Sugbuanon ilabina sa mga politiko maoy sentro sa wali ni Arsobispo sa Sugbu Ricardo Cardinal Vidal niadtong Domingo atol sa kapistahan ni Señor Sto. Niño.

Mensahe  ni Dakay ngadto sa publiko ilabina sa mga Sugboanon nga batonan ang pagkamapa-ubsanon aron maangkon sa hingpit ang dugay nang gipangandoy nga kahiusahan.

Bisan si Dakay duda sa gipakitang kaseryoso nila ni  Osmeña, Gobernador Garcia ug delos Santos sa nilabay’ng awarding ceremony sa Sinulog.

Si Osmeña ug Garcia nagtagad ug sadya nga nagpahulagway atol sa awarding ceremony dihang ang gobernador miuban sa mga opisyal sa lungsod sa Alcoy (Alcoy Siloy) nga midawat sa ilang premyo isip kampiyon sa Sinulog Based Category, samtang si delos Santos mao usab ang misaka sa stage aron pagkuha sa premyo sa Lahug nga 4th placer sa SB category.

Apan ning bag-ohay lang si Garcia namahayag nga ang ilang pagtinagdanay “Civil” lang isip  usa ka edukadong tawo ug isip pagka-Sugbuanon.