Taxi drayber nakaikyas sa mga tulisang buot nga mopatay niya

Naluwas ang usa ka taxi driver gikan sa posibleng kamatayon human siya magdudang dili lang kwarta ang tuyo sa duha ka tulisang mitulis kaniya kagahapon sa kaadlawon hinungdan nga iyang gikusog og abli ang pultahan sa iyang taxi ug mikaratel og dagan.

Ang taxi driver nga nakadagan gikan sa mga suspek giilang si Eduardo Tablada, 54, taga dalan V. Rama sa Calamban ning dakbayan ug nagmaneho sa N Taxi nga may plakang GVT-320.

Sa imbestigasyon sa kapolisan sa Pardo, ang biktima gipara sa duha ka wala mailhing mga lalaki diha sa Kinasang-an, Pardo.

Ang duha mimando kaniyang magpahatud ngadto sa Inayawan apan pag-abot sa may ngitngit nga bahin sa sitio Upper Tone sa Inayawan kalit nga mition og kutsilyo sa iyang liog ang pasaherong diha sa luyo milingkod.

Samtang mition usab og .38 rebolber ang tupad sa drayber nga pasahero dayong deklarar og "Holdap ni Noy, ihatag imong kwarta," ug gikuot ang bulsa nga gisudlan sa kinitaang P2,800.

Apan diha na malisang si Tablada nga ang usa sa mga suspek mikanaog ug milipot dayong suway og abli sa pultahan sa drayber, tungod sa kahadlok nga hasta iyang kinabuhi tuyo usab sa duha, gikusog pag-abli sa drayber ang pultahan hinungdan nga nakahigayon siya og karatel og dagan.

Ang suspek gikatahong mipusil pa kaniya makausa ka higayon apan wala kini makaigo ug daling gisumbong sa biktima ang insidente ngadto sa kapolisan.