.45 sa jailguard mibuto; kuyamoy sa tiil naibot

Usa ka sakop sa Bureau Jail Management and Penology (BJMP) nga nadestino diha sa Lapu-Lapu City Rehabilitation and Detention Center naunay sa iyang armas adtong milabay'ng adlaw sulod sa Lapu-Lapu District Hospital.

Napunggit ang usa ka kuyamoy sa walang tiil ni JO1 Ervin Ariesgado, hingkod ang panuigon human aksidenteng mibuto ang kalibre 45 pistola niini nga iyang gikasa aron unta pagpangandam nga mopauli.

Sigun pa ni SPO2 Rolito Jumaoas sa Banat News gibantayan ni JO1 Ariesgado ang bilanggong si Alex Ramos tungod kay nasakit kini ug padulong na unta relibohan ang maong guwardiya dihang mahitabo ang insidente.

Hinuon dali ra usab nga natambalan ang samad sa biktima ug luwas na sa peligro.

Samtang sa laing bahin, usa ka sakop sa Alpha Kappa Rho ang gipusil sa duha ka wala mailhing mga lalaking luwan sa motorsiklo diha sa Barangay Pajo sa nahisgutang dakbayan kagahapon sa kaadlawon.

Samdan sa iyang tiyan ug bukton ang biktimang si Darwin Tunacao,26 molupyo sa maong dapit ug miangkong sakop sa Akrho kinsa igo lang nangusyuso sa komosyon dili layo sa iyang gibarugan.

Sigun pa ni SPO2 Jumaoas nakalitan na lang siya dihang sa pagsusi unta niini kalit siyang gisugat sa mga gikatahapan dayong pusil ngadto kaniya, nagduda ang kapolisan nga posibleng sakop sa ribal nga grupo ang mipusil sa biktima.